Jop ka Ummulong SC ïaka Larnai SC haka sngi sdang ka 2nd Sniawbhalang Football Tournament

Syllad | The Rising MeghalayaOctober 7, 2019

JOWAI: Ka lympung ïalehkai football u MLA jong ka 1-Nartiang Constituency  kaba la tip kum ka 2nd Sniawbhalang Dhar Football Tournament kala sdang haka sngi Saitjaiñ ha madan ïalehkai ka shnong Wahiajer da ka namjop ka Ummulong SC da 3-1 kol pyrshah ia ka Larnai SC.

Ïa kane ka lympung la wan ban plie pyrda da u Myntri ka tnad Sports ka Sorkar Jylla u Banteidor Lyngdoh haka jingïadonlang u ma Sniawbhalang Dhar MLA ka thain bad uba long ruh u Myntri ka tnad Transports bad kiwei kiwei. La iadonlang ki MDC JHADC naduh u Ailad Bhoi, Jesse Suiam, Lakhon Dkhar, Octomewot Lamin, ki Waheh shnong bapher kiba hap haka thain Nartiang.U Ma Sniawbhalang ula ong ba ka jingthmu ba pynlong ïa kane ka lympung kaba u la bei pisa nadong sha  nadong kalong ban pynkhih mynsiem iaki samla haka ïalehkai sports namar ka kam ïalehkai mynta kalong ka kharkhana kaba aikam ai jam ïaki ba don ka sap ka talent ha kino kino ki jait ïalehkai. Ka jingïalehkai football ha kane ka thain kaba baroh ki sngewtynnad bad na ka bynta ban plie lad ïaki samla ban pynpaw ïaka sap jong ki la sdang ïa kane ka lympung la ar sien bad kane ka kynti.

Ula ong ruh ba u angnud ban pynkylla dur ïaka madan shnong jong ka Wahiajer ban iakot kyrdan bad kiwei kiwei ki madan ïalehkai khnang ban suk ki khynnah bad samla ban ïalehkai.

U Bah Banteidor Lyngdoh haba ken kum u kongsan ula ong ba ka Rilum Jaiñtia kala lah ban pynmih shibun ki nongïalehkai ba paw haka jylla. Ula kyntu ïaki samla ban pyndonkam hok ïaka sap khnang ba kin jop haka jingim ïalehkai.

Ula kular ruh ban pynïoh jingïarap ban pynbha ïaka madan ïalehkai jong ka shnong Wahiajer.

Ka khusnam pisa ha kane ka lympung, ka lahduh kan ïoh rah T.3 lak, ka lahduh ba ar T.1 lak, kaba lai T.60 hajar bad kaba saw T.40 hajar.