Jop ka Woodland WK Hospital ban sumar ia i khyllung ba ioh iaka jingpang ba kham niar

Syllad | The Rising MeghalayaOctober 20, 2022

Ka long ka khubor ba ai jingkyrmen ia u paid nongpang namar ka jingdon ka Woodland WK Hospital, ka hospital kaba dang shu plie ha kine ki khyndiat snem, kata haka 15 Nailur 2020 kala long ka jingkyrkhu na shalyndet hadien ba kala jop haka ban ai jingsumar ia i khyllung iba kyllung tam bad ka sien kaba nyngkong eh na ka jingpang jingshitom ba khamniar eh ban shem ha Rilum Jaintia.

Kane ka jingpang kaba kham niar ban iohpang kaba la lap da ki doktor dei kaba la tip kum ka Congenital Diaphragmatic Hernia ne ka jingpang hernia. Ka dei ka jingpang barit shilliang ki tor (lungs) na ka jingkiew ki snier shajrong ne ngiat jubor ia ki tor kaba ktah iaka jingheh jingsan ki tor kaba pynshitom haka ring pynhiar mynsiem.

Kane ka jingpang hernia la iohkem pang da iwei i khyllung ba dang shu kha ha Jowai Civil Hospital, Ialong. I dei I khun jong I kong Merry June, I longkmie na kawei ka shnong kaba jngai tang kumba 30 KM na Jowai.

Ia ine I khyllung la kha ia i haka 7 tarik Risaw 2022 bad ki doktor kila lap ba I don ia kane ka jingpang hernia. Ki doktor jong ka Jowai Civil Hospital Ialong mar sien lap ba ini I kyllung I shitom jur na kane ka jingpang hernia kila bthah ia kiba haiiing pynkit noh ia I sha kiwei ki jaka sumar ne hospital kiba don ventilator.

Kane kala kdew shai ba ka Jowai Civil Hospital kala phiel wat la ka dei ka hospital kaba la rim ha rilum Jaintia, hynrei ka duna iaki doktor ki tbit bad ki tiar ki tar. Haduh mynta ba ka jylla kala rakhe iaka 50 snem iaka jingioh jylla ba pura, kane ka hospital ka dei treikam hi tang kum ka referral centre. Bun ki case ne ki jingpang jingshitom kane ka hospital ka phah sumar sha ki jaka sumar kiba don sha sor Shillong bad kiwei kiwei ki jaka sumar.

Lah ban pynkynmaw ba iaki kor ventilators ha u snem 2021 la dep buh iaki haka COVID Hospital ha Maternal & Child Hospital ha Panaliar, Jowai. Kine ki ventilators mynta la bun bun bnai khlem pyndonkam ia ki ha kane ka Covid Hospital.

Kumta kiba haiing ruh khlem pynslem kila rai ban kit ia ini I khyllung ban phah sumar bad ka hospital kaba jan tam kaba don ha Rilum Jaintia, ka dei ka Woodland WK Hospital kaba la tip iaka kum ka multispecialty hospital kaba don ha Sabahmuswang, West Jaintia Hills District. Kane ka hospital ka jngai tang 7 KM na Jowai.

Kumta la pynkit ia ine I khyllung sha Woodland WK Hospital ban ioh iaka jingsumar kaba paka bad la buh ia I ha Neonatal Intensive Care Unit (NICU) hapoh ka jingkhmih jong ka Dr Snigdha Pathak paediatrician ne ki doktor ba dei peit iaki khyllung khynnah.

Ini I kyllung hadien ba ila kham ioh bor bad I don tang 3 sngi ba mih sha pyrthei, katta haka 10 tarik Risaw la sumar noh ia I hapoh ka jingkmih u Dr. Peter Daniel S Khariong, Paediatric surgeon haka jingiadonlang i anaesthetist Dr Sharon Rymbai bad u Dr Debashish Das bad ki OT staff Brother Jibon Roy Syngkon and sister Deimaya Pde.

Kane ka jingsumar iaka jingpang hernia ine i khyllung kala long jop bad kala wanrah iaka jingkmen ia baroh kiba haiing hasem ini I khyllung bad ka jingphuh phuhmat ki doktor bad ki nontrei ka aspatal ba kila ioh kheit ia u soh ka jingjop. La rah biang ia I khyllung sha NICU ban jurip bniah iaka jinglong jingman ka koit ka khiah jong i. Ha kane ka juh ka sngi la weng iaka ventilator bad haka sngi ka bud ini I khyllung I la ring pynhiar mynsiem hi dalade khlem pyndonkam iaki kor ki bor bad la rah ia I sha jaka buh khyllung ne baby room jong kane ka jaka sumar.

Ine I khyllung I shait I khlain bad ila ioh ruh ban dih iaka jymbuin I kmie haka sngi ba ar hadien ba la dep sumar. Haka 15 tarik Risaw 2022 ine I khyllung iba la ioh iaka met kaba koit kaba khiah ila ioh mih na Woodland WK Hospital.

Katkum ka jingiathuh ki doktor ka Woodland Hospital kane ka jingsumar ka dei kaba nyngkong eh ne 1^st Neonatal Surgery ha ka rekod jong kane ka hospital bad I nongpang ruh I dei iba khyllung tam ban shah sumar.

La iathuh ba kane ka jingpang kadei kaba kham niar ban lap bad ka ju lap tang ha u/ka nong pang iwei na ki 3000 ngut. Kum kine ki jingpang marsien lap dei ban phah sumar bad lada ym ioh ban sumar haka por kaba biang ka wanrah iaka jingjia kaba sngewsih.

Kane jingjop ka Woodland WK Hospital ban sumar ia ine I khyllung hapoh ka jingkhmih jong u Doktor Werlok Kharshiing, kum managing director ka hospital kaba don iaka thong ban ai ka jingsumar kaba bha tam ia u paidbah ka rilum Jaintia ym tang ba ka ai jingkyrmen ia kiba sngew kutlad, hynrei ba kan ioh ka jing ithuh bad ba hap ban tip ba kane ka aspatal kaba dei tang maka ha rilum Jaintia baroh kawei kaba biang ki kor ki bor bad ki doktor bad kam duna na kiwei ki hospital.