Jop ki nongmareh thong na Sabahmuswang ha ka Fit India Freedom Run 4.0 bad ka Run for Unity ha Jowai

Syllad | The Rising MeghalayaNovember 1, 2023

Ki nongmareh thong ka Sabahmuswang kaba kynthup ia ka Happiness Phawa bad u Teiboklang Biam ki la ioh ia ka jingjop ha ka jingiamreh thong ba la tip kum ka “Fit India Freedom Run 4.0 and Run for Unity” ba la pynlong haka sngi ba Ar ha Jowai.

Ia kane ka jingiakop la khot pynlong da ka ophis u Deputy Commissioner ka West Jaintia Hills District, ha ryngkat ka jingiatreilang bad ka Ophis District Sports Officer,West Jaintia Hills District, Jowai.

U Bah Khroobok Passah, District Sports Officer, u la kaweh ia ka lama ha kane ka jingiamareh thong ba la wan iashim bynta da kumba 155 ngut ki nongia mareh thong.

Kane ka jingiamareh ka la sdang napoh Main Gate ka Kiang Nangbah Stadium (ka jaka sdang) kaba lam ter ter sha Ladthadlaboh Main Road, Jowai Public School, Gate Polytechnic, Kshaid Rymphum, Salaroh, Dulong Poh-hali Road, Dulong, Pamhadem, Panaliar (Civil Hospital), Iongpiah, Mission Compound, H.K. Singh School, D.C. Office, New Hill, National Highway bad pynkut hapoh Kiang Nangbah Indoor Stadium.

Ha ka jingiakop hapdeng ki kynthei, ka Happiness Phawa ka la wan ha ka kyrdan kaba hakhmat eh ha kane ka jingiakop, katba ka  Monlangki Kyndait bad ka Mini Kyndait baroh arngut kiba dei na ka shnong Mihmyntdu ki la wan ha ka kyrdan kaba ar bad ba lai.

Katba sha ka liang ki shynrang u Teiboklang Biam u la wan hakhamt eh bad bud sa u Dasaman Kyndait na Sabahmuswang ha ka kyrdan kaba ar bad u Daemiryntihki Pakma na ka shnong Thadbamon ha ka kyrdan kaba lai.