Jop u Wanbok L Mawphlang bad ka Marqueenless Ramsiej ha ka “5th Shillong 10K Run”  

Syllad | The Rising MeghalayaJune 23, 2024

U Wanbok L Mawphlang bad ka Marqueenless Ramsiej ki la ioh ban rah ia ka nam lahduh ha ka jingiakop mareh ha ka liang ki shynrang bad kynthei ha ka “5th Shillong 10K Run,” ia kaba la khot pynlong da ka Meghalaya State Olympic Association (MSOA) ha ka step sngi Saitjain, 22 tarik Jylliew.

Kane ka jingiakop mareh ka dei kaba ju pynlong man la ka snem shibynta ban rakhe ia ka “International Olympic Day,” ia kaba ju rakhe ha ka 23 tarik u bnai Jylliew shibynta ban kynmaw naduh ba la seng ia ka “International Olympic Committee ha u snem 1894.”

Ia kane ka jingiakop mareh kaba 10 km ka jingjngai la pynlong ha baroh ki ri ka pyrthei ha ki sngi Saitjain kiba hajan eh shibynta jong kane ka jingrakhe, bad ka Shillong ruh ka la lah ban pynlong ia kane ka jingiakop ha kaba la wan ban iashim bynta da ki spah ngut ki nongiamreh thong naduh ki khynnah samla haduh kiba la san.

U Wanbok u dei uba la lah ban jam nyngkong eh ia u lain jingjop hapdeng ka jingiakop ha ka liang ki shynrang bad bud sa u Iwelljohn Ramsiej ha ka kyrdan kaba ar bad u Sainkupar Jyrwa ha ka kyrdan ba lai.

Katba ha ka liang ki kynthei, ka Marqueenless kaba la wan ha ka kyrdan kaba lai ha u snem ba la dep mynta ka la wan ha ka kyrdan kaba nyngkong, bud sa ka Balasiewdor Pathaw ha ka kyrdan kaba ar bad ka Ivanjilin Khongwir ha ka kyrdan ba lai.

Ha ka jingiakop mareh hapdeng kiba la palat ia ka rta 50 snem hapdeng ki shynrang, u Badon Tham u la bteng ban bat biang ia ka kyrdan ba nyngkong na u snem 2023, katba u Bah Swonding Mawlong bad u Laurence Pariong ki la wan ha ka kyrdan kaba ar ba ba lai.

Kumjuh ha ka liang ki kynthei kiba ha kane ka rta, ka Ralinda Marbaniang ka la wan ha ka kyrdan kaba nyngkong bud sa ka Kong Smarless Marwein ha ka kyrdan kaba ar bad ka Ibameri Shullai ha ka kyrdan kaba lai.Katba ka longkmie Kmoin Wahlang kaba dei ka nongiareh thong kaba la don 74 snem rta bad kaba long ka nongai mynsiem ia kiwei pat ka la wan ha ka kyrdan kaba saw.

Ia kane ka jingiakop mareh la kaweh lama da u Assistant Director ka Tnat Sports and Youth Affairs, u Bah Paia B War Nongbri ha ka jingiadon lang u General Secretary ka MSOA u Bah Finely L Pariat lem bad kiwei pat ki heh ka MSOA.

Kane ka jingiamareh thong ka la sdang na ka khyrdop jong ka madan Polo bad bteng sha  4th Furlong, BK Bajoria School, PGT College, Shillong Commerce College, Don Bosco Square, Laitumkhrah Police Point, Laitumkhrah Police Beat House, Fire Brigade, Dhankheti, Barik Point, Civil Hospital, State Central Library, Meghalaya Secretariat, Deputy Commissioner’s Office, Governor’s House, Ward’s Lake, Chief Minister residence shwa ban pynkut biang ha Polo Ground.

Ki nongjop ha kane ka jingiakop ki la ioh ban rah da ka song pisa kaba long T.5000 ia kiba wan nyngkong T.3000 kiba ar bad T.2000 kiba wan ba lai.Nalor kata la sam ruh ia ki consolation prize sha kiba wan ba saw haduh hynriew bad ki khusnam ba kyrpang sha kito ki nongiashim bynta kiba la rangbah ka rta.

Baroh ki nongiashim bynta ki lah ban download ia ki certificate iashim bynta jong ki lyngba ka MSOA website (www.meghalayaolympicassociation.com) hapoh ka shitaiew.