Jubab u MLA Mowkaiaw da ki kam ia kiba kynthoh ba u nang kren tang ha Assembly

Syllad | The Rising MeghalayaDecember 10, 2022

U MLA jong ka United Democratic Party (UDP)  na Mowkaiaw u Ma Nujorki Sungoh ula sdang ban jubab da ki kam, katta ban pynpaw sha ka pyrthei iaki kam pynroi ba ula wanrah hapoh Mowkaiaw Constituency shuwa ban pan biang iaka jingkyrshan u paidbah jied biang ia u kum u MLA.

Dang shen une u MLA ula shah kynthoh ha u candidate ka NPP ban iakhun iaka elekshon MLA 2023 uba dei ruh u MDC JHADC u Habahun Dkhar. Une u MDC u khlem kdew iaka kyrteng u MLA, hynrei ka jingkren ka thew ia u MLA ka Mowkaiaw ba u ong ba u shu pyni sha ka pyrthei ba u nang kren tang ha Assembly, ki kam pat ym don “Ï pynioo show off heh klam hapoh Assembly, i kam ha spot um em ong u Habahun kyrtong NPP Mowkaiaw”

Hynrei ka jingkren jong u MLA Mowkaiaw ma Nujorki Sungoh haka jingialang buh maw nongrim ban tei iaka skul Govt LP Skul bad ka Govt Upper Primary Skul Mowkaiaw haka sngi Thohdieng, ula ther pyrshah ia kiba pyrshang ban pynthame ia u paidbah da kaba kam iaki kam pynroi kiba ula wanrah ha Mowkaiaw Constituency.

Lah ban pynkynmaw ba u Nujorki Sungoh ula rah iaka sur bad ka jingeh u paidbah da ki mat iakren ha iing dorbar khamtam iaki ishu khappud Assam Meghalaya khamtam ka Block I kaba hap haka thain jong u, ka ñiut Jowai, ka jingdawa kyntiew kyrdan iaka Laskein C&RD Block sha ka Sub Division, ka kam rep kam riang bad kiwei kiwei ki ishu. Ki ishu kiba kren ym tang iaka constituency Mowkaiaw, hynrei iaki jingeh ka Rilum Jaintia kumjuh.

Haba kren shuh shuh hane ka jingialang buh maw nongrim ula ong “Kino kino ki kam pynroi kiba wan hapoh ka constituency jong nga kan nym jia khlem ka jingtip jong nga ha kine ki san snem.” Ula pynbna ruh ba ka sorkar MDA kala mang T.6 klur ban pynjlih iaka surok shnong ha Mowkaiaw baroh kawei.

Shuh shuh u Ma Nujor ula ong “Haka jingiaid lynti haka politik kin don ki briew kiban pynsngewthuh bakla bad kam ba ia kane ka surok la leh ne wanrah da kita kita, hynrei phi ki paidbah phim dei ban sngewthuh bakla namar phi la pynkup bor ia nga kum u nongmihkhmat jong phi.”

U Ma Nujorki ula kren bynñiaw halor ka jinghiar ki ba nang pule nang thoh hapoh ka Laskein Block sha ka 50 percent na ka 60 percent. Kumta u phai sha ki kmie ki kpa ban kyntu iaki ban ai ka jingiatreilang ban pynbha ia kane jingduna haka jingnang thoh tar bad pule ban wanrah iaka jingkylla.

Ka jingnang jingstad ka long kaba kongsan bad ka long ka atiar kaba ym lah ban knieh da mano mano bad tang ka jingnang jingstad kaba lah ban saindur iaka u/ka khynnah ban long ki myntoi jong ka imlang ka sahlang, la ong u Ma Nujorki.

Une u MLA ula pynbna ba nalor kitei ki ar tylli ki skul ha Mowkaiaw ba kum u MLA ula theh ka jingiarap ban tei iaka ïing skul ha Barato, Maitdeiñ bad kaba ap mynta ban pynioh iaka mang pisa kalong sa ka Khon Shnong, Umsalaiñ bad kiwei.

Ula pynpaw ka jingsngewsih halor ka jingjia ha Mukroh kaba hap ha Mowkaiaw constituency bad ka bad ka Jylla baroh kawei bad ban pynthikna ba kum kine ki jingjia kin nym jia, ka sorkar kala mang ban buh iaka Border Outpost  ha ka shnong Mukroh bad Tihwieh bad ia kine ki BOP yn plie paidbah haka 13 tarik une u bnai Nohprah.

Kiwei kiba la ai jingkren ki long u MDC ka thaiñ u Winning G. Sungoh, ka Kong AP Syiem DSEO West Jaintia Hills District haka jingdonlang u Block Development Officer (BDO) Laskeiñ C&RD Block u Bah Barrister Niang, ki kmie ki kpa, ki nonghikai bad ki khynnah skul.