Julor phom ki mar rep ba wan lynshop u phria ha kiba bun jaka ha Rilum Jaiñtia

Syllad | The Rising MeghalayaApril 11, 2020

U Phria ha ryngkat u slap bad ka lyer ba jur kila wan ban lynshop ha Rilum Jaiñtia ha ki bun tylli ki shnong kiba hap hapoh ka Thadlaskein bad Laskein Block.

Kane ka jingwan hap u slap u phria kala wanrah ka jingjulor kaba bun iaki jingthung jingtep kiba rep da ki nongrep jong kine ki ar tylli ki Block.

Mynta ka sngi haka por 1 baje nohphai sngi u slap ka lyer ba jur ha ryngkat u phria kila lyngshop ha kiba bun ki jaka.

Ka shnong Nartiang bad katto katne ki shnong ba marjan kiba hap ha Thadlaskein Block kila shah ktah jur ha u phria, katba ka Mooshrot kaba hap Laskein Block ruh kala shah ktah bha haka kane jinghap phria.

Kiba bun ki nongrep kila pynpaw ka jingsngewsih kaba jur namar ba kane ka dei ka por ba ki jingthung ki sdang ban heh ban san.

Kila iathuh ba kane ka jinghap phria ha Rilum Jaiñtia kala sdang naduh ka sngi Balang, hynrei ka jingrben kalong kaba malu mala, hynrei mynta ka sngi pat ka jingther u phria kala long kaba jur bad u heh kat u marbul.

La sakhi ruh ba lynti synkieng, ki phyllaw iing kila bad ki jaka rep kila shah tap ha u phria.

Ki jingthung kiba julor ki kynthup naduh u  riewhadem, sohsaw, sohmynken, sohkhia, sying, phan bad kiwei kiwei ki mar rep kiba la sdang ban khie lung.