Jur ka jingkhlong maw & shyiap na ki wah ha khappud India Bangladesh: JSU

Syllad | The Rising MeghalayaAugust 7, 2019

JOWAI: Ka Jaintia Students’ Union (JSU)- War Jaintia Circle ka ujor sha u District Commissioner, West Jaintia Hills ia ka jingkhlong maw bad shyiap beaiñ suba nong Bangladesh kiba la wan kiew ha ki Wah ba don ha ka thain ka War Jaiñtia kum ha Amlympiang, Amtyrngui bad kiwei kiwei.

Ka JSU kala kynnoh ba kane ka jingkhlong tuh ia ki maw kala poi shaduh ki bri kwai kaba la pynlong ia ka khyndew ban twa bad ruh ban khyllem noh ki dieng kwai.

Ka JSU War Jaintia Circle ha ka jjngialam u President U Eddy Kery Pohtam bad u Organising Secretary U Aibor Nonglamin ki la leit jurip bad la lap ia kane bad la sakhi ba la lut ki maw ha ki wah bad lah iohi ruh ba kane ka jia wat ha ki por mynsngi ba ki wan khlong maw kine ki suba Bangladesh.

u Eddy Pohtam ryngkat ki nongshongshnong jong ka thain ki la sngew bynniaw ba kumno ka BSF kim leh ei ei ban beh ia kine ki nong Bangla wat ha ka por mynsngi.

U Eddy Pohtam ki shipai BSF ki shimting ïala ka kam ram bad pynpaw ba ka jngthmu ker sainar shiah kan ym don jingmut namar ba ki BSF hi kiba ailad bad kine ki suba nong Bangladesh kim salia shuh ban prong jubor shapoh u pud u sam ka Ri India. Ka jingpahara jong ki shipai kam don jingmut namar ba ki kim shimkhia ban beh ia kine ki suba Bangladesh.

U DC u kubur ba ka don kane ka jingkhlong maw shyiap ha khappud bad la lap ruh ba ki don ki kor tyllait maw ha border sha ka liang ka ri Bangladesh bad ula ba kane kalong ka mat jingiakren kaban sa long ha u ne u bnai Nailar bad ka ri Bangladesh.

Shuh shuh ka JSU kala pynpaw ruh ba ka jingbym don bording ha ka shnong Amdoh bad kiwei kiwei ki shnong ba marjan kala pynlong ïaki nongkhlong maw bad shyiap kiba suba nong Bangladesh ban shimkabu bad leh kine ki kam beaiñ. Halor ka JSU kala dep ujor sha ka MePDCL ban pynbiang bording ha katei ka thain ban ioh jingiarap bad myntoi u paidbah.