Jur ka shalan masi tuh sha Bangladesh dawa ki lai seng ban thung da u magistor ban khynra ïaki trok

Syllad | The Rising MeghalayaMay 8, 2019

JOWAI: Ki lai tylli ki sengbhalang kiba kynthup ia ka All Jaiñtia Student Union (AJSU), ka All Jaiñtia Hills Social Welfare Organisation (AJHSWO) bad ka Hynniewtrep Youth Council (HYC) kila leit buh da ka dorkhat ha u Deputy Commissioner ka West Jaiñtia Hills District haka 7 tarik une u bnai ban ujor halor  ka jingjur palat ka jingshalan tuh iaki masi manla ka miet sha Bangladesh.

Kane ka jingshalan tuh ia ki masi sha Ri Bangladesh kala ktah ruh ia ka dor jong ka dohmasi hapoh rilum Jaiñtia na ka daw jong ka jingduna masi bad u paidbah ula ud halor ka jingrem dor jong ka dohmasi.

Naka liang kine ki lai tylli ki sengbhalang haka miet 6 atrik kiila leit hi dalade ban jurip haka surok Jowai-Amlarem-Dawki  bad ha katei ka miet ha ka por kumba 9:30 PM kine ki nongialam seng kila lap da ki phew phew tylli ki trok kit masi ki iaid lyngba u surok Jowai-Amlarem-Dawki kiba kit masi bad la suba jur ba ki dei kiba shalan beaiñ sha Bangladesh.

Shuh shuh la ong ba ki Challan ba kine ki trok ki ioh ka dei ban pynpoi ia ki masi tang haduh ka shnong Demthring, West Jaiñtia Hills. Katba kiba bun hi ki trok ki masi ki dei kiba shalan tuh ïaki masi sha Bangladesh.

Ha katei ka miet ki nongialam jong kine ki seng kila pan jingiarap ruh na ki Pulit Amlarem ban bat ia ki ar tylli ki trok ba la phah pynsangeh kiba don ia u Register ML 04-A 8835 bad ML04B 8099, haka jaka ba la pynsangeh ia kine ki trok, la kynnoh ba ki pulit ki la shu ai daw kumne kumtai bad kila shu phah iaid beit ia kine ki trok kaba pynsuba jur ba ki pulit ruh kila lah ban donkti haka kam shalan masi tuh.

Ha ka jingiadei bad kane naka liang u General secretary ka AJSU, PS Phawa u la pyntip ruh sha u SP ka WJH, hynrei haduh mynta na ka liang ki pulit kim pat shem la leh ei ei ruh.

U DC West Jaiñtia Hills hadien bala ioh ïaka dorkhat ula ong ba un shimkhia ia kane ka kam. Kine ki lai seng kila dawa na u DC ban pynlong ka jingkhynra iaki trok kit ba iaid iaka surok Jowai-Amlarem-Dawki bad ban phah da u magistor bad pulit bad ka kynhun nongring dur ban lap ïaka jingshisha halor ka jingshalan masi beaiñ na kane ka thain sha Bangladesh.