Jurip ka HYC War Jaintia Circle iaka Pdengshakap PHC, lap shibun ki jingduna

Syllad | The Rising MeghalayaAugust 27, 2023

Ka Hynniewtrep Youths’ Council (HYC) War Jaintia Circle ka la pynlong ka jingleit jurip ia ka Pdengshakap PHC ha kaba ka la lap ia shibun bah ki jingduna.

Ka HYC kala pynlong ia kane ka jingleit jurip haka 23 atrik une u bnai hapoh ka jingialam u president Yoodahunki Shylla ryngkat ka jingsynran lang ki dkhot ka HYC, kata hadien ba ki la ioh pdiang ia shibun ki jingud jingnam na ki paidbah bad na ki nongtrei jong katei ka PHC.

Ka HYC lyngba une u kyrwoh ka la ong ba ha kane ka jingleit jurip ka la ioh ruh ban iakren markhmat bad I M/O incharge jong katei ka hospital Dr. Shemphang Pohtam u ba la iathuh ba kane ka PHC ha ka por ba slap baroh ki ward ki slei um namar ka jingbym biang shuh ka jingtei ne ka building jong kane ka jaka sumar.

Nalor kata i la pynpaw ruh halor ka jingbym biang shuh ka kali Ambulance ban kit ia ki nongpang haba jia ki jingjia ne case kiba donkam kyrkieh, bad ka jingthud palat jong ka network ruh ka la pyntkoh shibun ia ka jingtreikam ka PHC.

Ha kaba iadei bad ka MHIS scheme bad kiwei ki bynta kiba iadei bad ka online, bun ki hap ban leit wad network khnang sha ki jaka ba biang ka internet tang ban ioh leh Ia ka finger print, kumjuh ruh ka jingbym treikam shuh ki solar kaba 50 KWp SPV Power Plant kaba hap hapoh ka solar PV power Scheme of MNRE. Govt of India ba la pyntreikam da ka MNREDA Shillong naduh u snem (2016-17) bad project executive by Aditi Solar Private Limited kim shym la treikam shuh haduh mynta mynne.

Shuh shuh ka HYC kala ong ruh ba haba peit sha ka phyllaw jong PHC ka long kaba i sangsot haduh katta katta namar wat tang ki jaka bret niut ne ki dustbin ban bret Ia ki jaboh jabain ruh kim don shuh,bad ki jaka leit shabar kim da biang shuh. 

Ha kajuh ka por na ka liang HYC ka kyntu jur ia u doktor ban shimkhia ruh ha kaba iadei bad ka por wan trei jong ki staff kane ka jaka sumar khnang ba kan ym ktah ia ki paidbah jong ka  thain War East kiba donkam ia ki lad jingsumar bad khnang ban lait na kino kino ki jingshah ha ki paidbah nongshong shnong.

Kumta ruh na ka liang ka HYC ka kyntu jur ia ka sorkar lyngba ka tnat ka koit ka khiah ba kan shimkhia mardor ha kaba iadei bad ki jingduna hapoh kane ka PHC. Na ka liang ka HYC ka la ong ruh ba kan dang  iai buddien Ia kine ki mat jingdonkam jong ka PHC sha ka sorkar na ka bynta ka jingmyntoi jong ki paidbah ka thain hi baroh kawei.