Jurip ka Kong Santa Mary Shylla iaka jingtwa khyndew ha surok bah NH 6

Syllad | The Rising MeghalayaAugust 13, 2024

Ka MLA Sutnga Saipung ka kong Santa Mary Shylla haka 12 tarik Nailar kala jurip iaka jingtwa khyndew haka surok bah NH6 ha Kuliang, East Jaintia Hills District.

Kane ka jingjia twa surok ha Shnong Kuliang kala long kaba jur bha bad kala tap smam iaka surok bah kaba la wanrah iaka jingsahkut ki kali ha baroh arliang ka surok.

Ha kane ka jingjurip la iadonlang ka u Deputy Commissioner, East Jaintia Hills Shivansh Awasthi IAS bad u SP ka district Giri Prasad IPS, Project Director NHAI bad kiwei kiwei

Na kaliang ka NHAI kala pynpoi iaki puh shilum ban pynkhuid iaka khyndew kaba twa ha Kuliang. La bthah ruh iaka NHAI ban pyndap iaki thliew ki syar ha shilynter ka surok bah bad ban pynkhuid iaki nala um ban lait na ka jingjulor shuh shuh.

Haba pynpaw lyngba ka facebook, ka kong Santa Mary Shylla kala ong ba ka jingjurip kalong ban shim jingkhein ïa ka jinglong jingman bad ban wad ki lad ki lynti ban pynjem iaka jingeh ha kaba iadei bad ka jingtwa surok man la ka por.

“Ka jinglong jingman jong ka surok NH6 ha East Jaintia Hills khamtam na Lumshnong haduh Malidor ka long kaba sniew haduh katta katta bad ki briew ki don iaka hok ban kynthoh ia ka NHAI bad ia ka sorkar, hynrei ka long ruh kaba donkam ban sngewnguh iaka Sorkar bad ka NHAI kiba leh shitom ban pyndep iaka jingmaramot iaka surok,’ la ong ka kong Santa bad bynrap ba ka jingeh kaba khraw kaba ka NHAI ka iatakhuh kalong namar ka jinglong ka suin bneng kaba wanrah iaka jingsangeh ka jingtrei.

Shuh shuh kala ong ba u kontraktor bad ka NHAI mynta kila shna iaki kynroh (retaining wall) kumjuh ki nala, hynrei ki dang ap ruh ban ailad u slap ban sdang sa iaka jingsiangrong iaka surok.

“Ka NHAI kan shim iaki sienjam kiba biang ban pynsuk iaki paidbah haka leit ka wan bad ka bor district ruh kan buddien man ka por halor ka jingtrei iaka surok. Nga sngewthuh iaka jingeh kaba iatakhuh ki paidbah namar ka jingtwa khyndew kaba jia man ka por, hynrei nga kyrmen ban ka mariang kan ailad bad ka NHAI kan ioh ban trei iaka kam.” ong ka kong Santa.