Jurip ka KSU iaki jaka sumar, lap ba bun ki jingduna ban iakhun khlam COVID-19 ha rilum Jaiñtia

Syllad | The Rising MeghalayaMay 13, 2021

Ki dkhot ka Khasi Students Union (KSU) War Jaintia Circle bad Khliehriat Circle kila lap ba don shibun ki jingduna ha ki jaka sumar ha rilum Jaintia ba kane kan buh jingeh lada shyrkhei ka jinglyngshop ka khlam COVID-19.

Haka jingleit jurip iaki jaka sumar ka KSU War Jaintia Circle haka sngi Palei iaki jaka sumar ha Amlarem Sub Division wat la ka jingpynkhreh jong ki jaka sumar kala iaid shakhmat, hynrei kaba pynsngewdiaw iaka KSU ka long ba lada wan lyngshop ka khlam kaba shyrkhei kan buh iaka War Jaintia haka jingeh.

Ka KSU kala ong ba ha kaba iadei bad ka Pdengshakap PHC, u Doctor katei ka jaka sumar ula pynpaw ba ka lah ban pdiang ïa ki briew ba ïoh positive katkum ka jingthiah bad ki kamra ba kyrpang bala buh bynta iaki nongpang, hynrei ka long kaba jynjar namar ba kane ka jaka sumar kalong kaba khapngiah bad ia kiwei ki jait jingpang ba man ka sngi ruh ki hap ban pdiang haka PHC.

Ha Nongtalang CHC ki jingthiah ba kyrpang ki don shiphew kamra ryngkat ki tiar pyndonkam kum ki oxygen cylinder bad kiwei ki tiar kiba lah ban ai jingïada na ka khlam, hynrei ka jingeh jong kane ka CHC ka long ba tang shu lip bording ym lah ban pyntreikam ïaka oxygen. U Doktor ula ïathuh ba ka don ka solar light ha kane ka CHC hynrei kam treikam shuh namar ym don ba wan shna ïaka, la ong ki nongialam ka KSU.

Haba ïadei bad PHC Dawki kawei na ki jaka ai jingsumar kaba lah slem hapoh ka thaiñ ha kaba ka ïing jong ka ruh ka long kaba rit bad shem shitom ban pynrung shibun ki nongpang bad lada jia ba don kiba ïoh pang khlam la hap ban buh hajuh ïaki nongpang.

Baroh ki doktor kiba don ha katei ka thaiñ ki pynsngew ba ka donkam ban buh ïa kawei ka Corona Care Centre hapoh Amlarem Sub Division.

Ha kane ka jingleit jurip ka KSU la iadonlang u President u Laitphar Syngkrem, u General Secretary Lurman B Talang, Finance Secretary Kindly Khyriem bad Publicity Secretary Michel Platini Mukhim.

Ha kawei pat ka khubor ka KSU Khliehriat kala jurip iaka Khliehriat CHC bad kala iakynduh ruh ia District Medical & Health Officer, East Jaintia u Dr D. Shylla uba la ïathuh ba ïa mynta ki bor pynïaid hospital ki long kiba la pynkhreh bha ban ïakhun ïa une u khñiang bad ki tiar kum ki oxygen, ki dawai tika bad kiwei kiwei ki long kiba biang lut.

Ula ïathuh ba ka jingwan jong ki briew ban ai injek tika ka long kaba duna bha bad ula kyrpad ïa baroh ki nongshong shnong ban wan shakhmat ban eit ai injek tika khlam COVID-19 sha ki jaka ba la pynbeit khnang ban ïada na ka jingpang COVID-19.

Nalorkata ula ïathuh ba ha kane ka CHC la sumar haki 4 bynta ïaki nongpang COVID-19 kum A, B bad iaki C bad D la phah noh sha ki Hospital kiba don ICU.

ka KSU Barato Unit kala jurip iaka Barato PHC la iathuh ba ki jing pyrkhreh ki la biang lut naka bynta ban iakhun ia ka khlam covid-19 hynrei ba duna dei ka isolation ward.

Ka KSU Nartiang Modop Unit ka la leit ban jurip ia ka Nartiang PHC kaba don ha ka shnong Nartiang ka long kaba la pynkhreh bha na ka bynta ban iada na kane ka khlam COVID-19 bad kala dep pynbiang ia ki jingdon kam naduh kitiar ki tar kum ki Oxygen Cylinders, ki humidifiers, Oxygen Conservation, ki jingthiah ki dawai bad kiwei kiwei ki jingdon kam.

U Dr.Pohsnem i badei i incharge jong ka Nartiang PHC bad kumjuh ruh ia ki staff jong i kiba la trei shitom ban pynbiang ia ki jingdon kam jong ki paidbah nongshong shnong jong ka thain khamtam ha kum kane ka por ban ia khun pyrshah ia ka jingsaphriang jong u khniang jingpang Covid 19.

Ki nongialam ka KSU kila dawa na ka sorkar ban pynbiang iaki tiar ki tar ba donkam khnang ba ka jingiakhun iaka khlam COVID-19 kan long kaba jop.

Ka KSU kala ai khublei iaki doktor, ki nurse bad ka tnad ka koit ka khiah bad ki bor pyniaid District jong ka East bad West kiba hadpeng ka jingduna kila pyrshang katba lah ban iarap ia u paidbah uba shah ktah haka khlam.