Jurip u DC ïaka jaka ri syiar ha kyrpong ka Khliehriat CHC

Syllad | The Rising MeghalayaFebruary 10, 2021

U Deputy Commissioner ka East Jaintia u Bah E Kharmalki ryngkat u District Medical & Health Officer (DM&HO) bad ki dkhot ka EJNC Khliehriat West haka sngi Balang ki la leit jurip ïaka jaka ri syiar jong u ma Vesper Lamare kaba don ha kyrpong ka Khliehriat Community Health Center (CHC).

Kane ka jinghiar jurip ka la long hadien ba ka East Jaintia National Council (EJNC), Khliehriat West ka la buh da ka jingthoh ujor sha u DC ba un shimkhia ban tohkit haka jingïadei bad ka jingïap jong ki syiar ha katei ka jaka.

U ma Vesper Lamare ula kynnoh ba ki spah tylli ki syiar jong u, ki ïap naka daw jong ka um jakhlia kaba wan tuid na CHC sha ka jaka ri syiar jong u naka ka jingtwa ka kynroh jong katei ka jaka sumar.

Haba ïadei bad ka jingïap ki syiar, u ma Vesper Lamare ula ujor shaka EJNC bad ka EJNC ka 21 tarik Kyllalyngkot (January) ka la leit ban jurip bad ka la lap ba ki sem syiar ki la dap da ki um jakhlia umtngit kiba sma iwtung bad shibun tylli ki syiar ki la ïap.

Ha katei kajuh ka sngi ka EJNC ka la leit ïakynduh ïa Medical Superintendent jong ka Khliehriat CHC Dr. Nidamon Pahoh bad kyntu ban leit jurip dalade ïa katei ka jaka ri syiar bad dawa ban siew bai lutksan hynrei la kyntait ïaka jingdawa jong ka EJNC.

Ka EJNC kala ïa kynduh sa ïa u DM&HO bad ula phah iaki dkhot ka EJNC ban ïakren bad ka tnad Vertinary ban leit jurip ïa katei ka jaka syiar hynrei naka daw ka jingpynshlem bad ka jingbym shim khia jong ki nongpynïaid ka Khliehriat CHC ka um jahkhlia ka la rngad bad ka um jakhlia kaba lait lyngba ki pipe la dep ban maramot noh bad ki doktor jong ka tnad Vertinary kim lah shuh ban pynshisha halor ka jingïap jong kitei ki syiar, la kynnoh u Shanborlang Bamon President EJNC-KWU.

“Naduh ba rngad ka um jakhlia ki syiar jong u u ma Vesper Lamare kim juh ïap shuh bad kane kala pynsuba jur ba kitei ki syiar ki ïa na ka um jakhlia jong ka CHC”, la ong shuh shuh u Bamon.

Ha ka jinghiar jurip u Deputy Commissioner ula bthah ïaki nongpynïaid jong ka CHC ban pynïaid (divert) noh ïaki jakhlia sha kawei ka jaka bad ïaka bai lutksan jong u ma Vesper Lamare ula kular ban khot da ka jingialang jong baroh arliang ban ïakren pynbeit halor kane ka kam.