Jurip u Lahkmen iaka jaka ban tei iaka 50 Beded Sub Divisional Hospital kaba nyngkong ha rilum Jaintia

Syllad | The Rising MeghalayaNovember 8, 2024

Da ka jingthmu ban pynwan dur bha iaka jingtei jong ka 50-Sub Divisionnal Hospital kaba nyngkong eh hapoh Rilum Jaintia bad kaba ar haka Jylla, u MLA ka Amlarem bad Chief Adviser ka sorkar Jylla Bah Lahkmen Rymbui haka 8 tarik Naiwieng ula leit ban jurip iaka jaka kaba la mang ban tei ia katei ka Hospital haka shnong Jarain kaba hap hapoh ka Amlarem Sub Division, West Jaintia Hills Distrct.

Kumban shu pynkynmaw la buh ia u maw nongrim ban tei ia kane ka Hospital haka 20 tarik Nohprah 2022 bad la mang ban pynlut 11 klur tyngka haka jaka kaba heh kumba 7500 sq ft.

Ha kane ka jinghiar jurip la don ryngkat lang ki ophisar ka tnad ka koit ka khiah, ki bor pyniaid shnong, ki riew rangbah ka thain nalor kiwei kiwei.

Ki paidbah ka thain ki thrang bad angnud la slem bha ban don kane ka hospital kaba heh hapoh ka thain Amlarem, bad ka jingioh ia kane ka hospital ka long ka jingkyrkhu iaki paidbah ka thain, la ong u Bah Lahkmen.

Ula pyntip ruh ba kane kadei ka 1st Phase bad ki jingtei ki kynthup 13 tylli ki Quarter bad la buh por ban pyndep hapoh 24 bnai.

“Ka jingdon jong ka Sub Divisional Hospital hapoh ka thain kan ai jingmyntoi ymtang iaki nong Jaraiñ, Umladkhur, Thangbuli bad Skhentalang hynrei iaka paidbah ka thain 7 Amalarem hi baroh kawei”, la ong u Bah Lahkmen.

Kumta u Bah Lahkmen ula pynpaw ka jingsngewnguh bad aikhublei ia u Myntri rangbah ka jylla Conrad K. Sangma, u myntri barim ka tnad ka koit ka khiah James PK. Sangma kumjuh ka Dr. Ampareen Lyngdoh Myntri ka tnad ka koit ka khiah ka sorkar Jylla kiba la ibit ban kyntiew kyrdan iaka Jaraiñ PHC sha ka 50- Bedded Sub Divisional Hospital.