Jurip u Lamphang ia ka iingdorbar bathymmai, kular ban pyndep hapoh u Nailar 2024

Syllad | The Rising MeghalayaDecember 6, 2023

U Lamphang ka iingdorbar thaw ain ka jylla, u Thomas A Sangma, haka 5 tarik Nohprah u la pynlong ka jingleit jurip ia ka jingtei jong ka iingdorbar thaw ain kaba thymmai ha Mawdiangdiang ha kaba u la pynpaw ruh ba ki don ia ka thong ban pyndep noh ia kane ka jingtei ha u bnai Naitung lane u Nailar 2024 khnang ban ioh pynlong ia ka Dorbar Synrai.

Na ka liang u Lamphang u la khot pynlong ruh ia ka jingialang bishar kam ha kaba iadei bad ka jingpyniaid shakhmat ia kane ka jingpyntrei ha ka jingiadon lang u Symbud Lamphang u Timothy D Shira, u Commissioner & Secretary ka Meghalaya Legislative Assembly u Andrew Simons bad ki ophisar na ki tnat bapher bapher.

Hadien kane ka jingleit jurip bad shong bishar kam ha Mawdiangdiang, na ka liang u Lamphang ula pynthikna ban shim ia ki sienjam na ka bynta ban pyndep noh kham kloi ia kane ka jingtei. Nalor kata u la buh por ruh ban pyndep ia kane ka jingtei hapoh jong u bnai Naitung lane u Nailar 2024 khnang ba yn lah ban pynlong ia ka Dorbar Synrai ha kane ka iingdorbar kaba t hymmai.

U Lamphang haba aijingkren ha ka jingialang u la ong; “Ngi la khot ia ki tnat bapher bapher kynthup naduh ka Tnat PHE ka ban khmih halor ka jingpynpoi um hapoh kane ka jingtei, kumjuh ia ka Tnat Social Forestry na ka bynta ka jingpynwandur bad pynitynnad ia ki sawdong sawkun jong kane ka jaka, ka Tnat Arts & Culture ka ban khmih halor ki jingpynitynnad lyngba ki rong ki rup kiba iadei katkum ka tynrai kumjuh ruh ia ka Tnat IT bad NIC.” Kumta u la ong ba ki la shim ia baroh ki sienjam lyngba ki tnat bapher bapher ban pynthikna ban pyniaid shakhmat ia ki jingtreikam.

Ha kaba iadei bad ka jingpynieng ia u dome jong kane ka iingdorbar thawain, u Lamphang u la ong ba ia baroh ki lyngkhot kiba mih lyngba ka jingtwa jong une u dome la dep ban pynkhuid baroh bad ka jingpynkhreh ia ka jingtei kala iaid shakhmat.

Nalor kata u la pyntip ruh ba ia une u dome uba thymmai yn tei da kaba pyndonkam da ki steel ia kiba la khmih lynti ba kin wan poi mynta u bnai lane ha u Kyllalyngkot u ban wan. U la ong ba la khmih lynti ruh ba ka jingpyndait ia kine ki steel kan sdang ha u bnai Rymphang bad yn pyndep ha u bnai Iaiong 2024. U la bynrap ruh ba ka jingtei ia une u dome kan dei kaba khmih lang da ka IIT Guwahati bad ka IIT Roorkee.

Shuh shuh haba pynpaw halor ka Phase-II jong ka project, u Lamphang ula pyntip ba na ka liang ka Ministry of Development of North East Region (DoNER) kala ai jingkular ban bei pisa ia ka Phase-II bad ka jingpynkhreh ia ka Detailed Project Report (DPR) kala iaid shakhmat.