Jyllei ki challan Mawshun beaiñ; tuid ka khajna shabar ka pla tyngka sorkar

Syllad | The Rising MeghalayaJanuary 27, 2019

JOWAI: Wat la ka pla tyngka jong ka sorkar jylla ka hiran namar ka jingkhang tih dewiong bad shalan dewiong, pynban da ki klur ka khajna baka dang dei ban ïoh ka lait ei shabar ka pla tyngka jong ka namar ka jingjyllei ki challan beaiñ ban khaïi mar poh khyndew.

Ki nongkhaïi bad ki trai par Mawshun na ka thaiñ War Jaiñtia kila kynnoh ba mih ki challan beaiñ kiba suba jur ba ki dei kiba beaiñ. La suba sniew ba kine ki Challan kila mih ba don ka jinglehkhlieh shrieh hapoh ka tnad kam khlaw ka jylla bad ki nongkhaïi mawshun, mawsalin mawslate kylleng ka jylla watla kim don ïaka Mining Lease ban khaïi mawshun, mawsalin mawslate sha Bangladesh.

La kynnoh ba kane ka jingmih kine ki challan beaiñ, ka la ktah shikatdei eh ïa kiba trai par mawshun mawsalin na Nongtalang, Amtapoh, Dawki kiba don Mining Lease naka sorkar jylla lyngba ka Meghalaya Minor Mineral Concession Rules (MMMCR) 2016 namar ba ki hap siew ki khajna ba har rukom naduh ka ba sdang ban leh ïaka Mining Plan haduh ban ïoh ïaka Letter of Intent ban ïoh sdang ka jingtrei ne khlong Mawshun Mawsalin.

Katkum ka Mining Lease ba uno uno uba don license u dei ban bud ryntih ïaki aiñ ïada mariang bad ki um ki wah kumjuh ruh kam dei ban ktah ha ki jaka shong sah ki briew.

Katkum ka kyndon jong ka MMMCR ki trai par ne nongkhaii Mawshun ki hap ban bud ryntih ïaki aiñ ka kam khlaw bad ban shallan ïa u mar ruh ki trai par hap ban ïoh challan bad dei ban pynpaw ïaki kali number ban kit ïa u mar bad ïa kane ki hap ïoh naka tnad kam khlaw na kano kano ka jaka kaba ïoh mining lease.

Pynban kaba lyngngoh ki don nongkhaïi kiba wanrah ki challan beaiñ kiba na kiwei ki jaka (Kata kum na Elaka Narpuh. Majai bad kiwei kiwei) bad kiba bym don Mining Lease sha ka thain War Jaiñtia bad  ki dang ïoh ka lad ban shalan mar sha Bangladesh, kaba la kdew shai ba katkum ka MMMCR ba la khang pyrshah.

Ki trai par mawshun na War Jaiñtia kila buh jingkylli ïaka tnad kam khlaw bad ka sorkar jylla ba kumno ki Challan beaiñ ki mih? Kaba la pynsuba jur ba ka don ka jingbam sap kaba shyrkhei hapoh ka tnad kam Khlaw.

Ki trai par mawshun na War Jaiñtia kila kynnoh ban ot ïaka challan ki hap ban siew ka khajna ba har rukom bad kiba don mining lease lei ki hap ban siew naduh ka bai stamp ban apply mining lease, ka (a) Royalty (b) Cess (c) GST (d) DMF District Mineral Fund bad ka Environmental Reclamation Fund bad kiwei kiwei sha ka Sorkar, hynrei kine ki shallan beaiñ pat kim donkam ban leh eiei bad ki shu kit ei ïaka mar bad ïohnong shibun shibun. Hynrei ka jingdonkam kine ki challan beaiñ kala pynshlur ban leh beaiñ bad bam ei ïaka khajna ba dei ban siew sha ka sorkar.