Jyllei ki jhur khlaw kiba tei ïaka met, khyndai jait la lap tang haka shnong Skhenpyrsit
JOWAI: Ka Society for Urban and Rural Empowerment (SURE) ha ryngkat ka jingïatreilang bad North East Slow Food and Agrobiodiversity Society (NESFAS) kila pyntreikam ïa ka projek kaba hikai ïa ki paid nongshong shnong ha kaba ïadei bad ka jingdonkam ban bam ki jingbam batei met da kaba pynim bad pynkhlaiñ ïa ka jingbam tynrai. Ha kane ka projek la hikai ïa ki paidbah shaphang ki shiphew thup ki jingbam kiba tei met bad ba donkam ban bam ym duna ïa ki san jait haka shisngi khnang ba ki briew kin ïoh ïa ka jingbam kaba bit babiang ne kaba tei ïa ka met.
Katkum ka kaiphod jong ka National Family Health Survey (NFHS-4) bala leh ha u snem 2015-2016 kala lap ba 63.8 percent na ki khynnah ba don haka rta naduh 6-59 bnai ki don ka jingpang duna snam, kumjuh ruh 45 percent ki kynthei ki bym armet kiba don ha ka rta 15-49 snem ruh kumjuh ki ïoh ïa kane ka jingpang. Kumjuh ruh 58 percent ki kynthei kiba armet kiba don ha kane ka juh ka rta (15-49) ki ïoh jingpang duna snam. Nalor kata 44 percent ki khynnah kiba don ha rta hapoh san snem ki duna ka jingjrong jong ki haba ïa nujor bad ka rta jong ki bad 15 percent ki don ka jingshitom duna jingkhia. Kane ka pynshisha ba ki nongshong shnong ha kane ka jylla khamtam ki kynthei bad ki khynnah ki ïoh ïaka jingpang kaba mih naka jingduna ka bam kaba tei met.
![](https://www.syllad.com/wp-content/uploads/2024/09/JIT-Vacancy-823x1024.avif)
Khnang ban pynsngewthuh ïa ki nongshong shnong ha kaba ïadei bad jingpynmih ïaki jingbam batei met, ka NESFAS bad ka SURE kila pynlong ïa ka jingïathir jingmut bad ki (Participatory Guarantee Scheme) PGS group, kumjuh ruh ki nongïalam shnong ka Shkenpyrsit haka 21 tarik une u bnai ïa kaba la lamphang da u Pius Rani u Senior Associate ka NESFAS.
Ka jingmih na kane ka jingïathir jingmut ka long bala lap ba ki briew ha kane ka shnong ki rep jin haduh 25 jait ki jait jhur bad khyndai jait na kine ki dei ki jhur khlaw. Nalor ki jhur kum u tyrso, ki jeit presbin babun, piskot, sohkhia, pathaw babun jait bad kiwei kiwei, ki jhur khlaw kiba don ha kane ka shnong kidei Jajew/ïajaw sñiuh, Tynkhieh, Salachet, Panai, Slashan, Jaraiñ, Tyrki, Jali bad ka Ïarut. Lada ki briew ki briew ki bam tang ïa kine ki jhur kiba don ha shnong, kim dei shuh ban dang ïoh ïa ki jingpang duna snam ne kiwei pat ki jingpang kiba mih naka jingduna bam ïaki jingbam batei met.
La lap ruh lyngba kane ka jingïasam jingmut ba kiba bun na kine ki jingthung ki dei kiba biang bha ban rep bad ba kam don jingeh ban ïoh symbai namar ki nongrep ki dang ïa buh symbai hi. La kyntu namar kata ïa ki nongrep ba kim dei ban rep tang ban die ne tang ban ïoh pisa, hynrei ba ki dei ban pyrkhat ruh ha kaba ïadei bad ka jingkoit jingkhiah la jong ba jong ki khun ki kti. La kyntu ruh ïaki ba kin nangrep khambun ha ki snem kiban sa wan khnang ba ki ïoh die bad ban ïoh bam pura ïalade ruh.
Ha kane ka jingïamir jingmut la ïadonlang ruh u Secretary ka shnong Shkenpyrsit u ma Smenlang Kyndait, kiwei pat ki dkhot ka shnong, ki nonghikai haki skul ha kane ka shnong bad nongtrei jong ka SURE. U HH Mohrmen Seretary ka SURE haka jingkren jong u ula pynkynmaw ba ki briew ki lut pisa ha kaba leit shim dawai, hynrei lada ki bam ka jingbam kaba tei met kata hi kan ïada ïaki nakiba bun ki jingpang. Ula ong ruh ba ngim dei shuh ban ong ba ngi ki nongrep baduk, ngim ïohlad satia ban bam ki jingbam bateimet namar ki jingbam ki don ha ki shnong jong ngi.
Leave a Reply