Ka ain kan leh da kaba tyngeh pyrshah ia ki nongkhaii drok; ong u Myntri

Syllad | The Rising MeghalayaSeptember 4, 2024

U Myntri ka Sorkar Jylla u Bah Kyrmen Shylla ha ka 3 tarik Nailur ula ong ba ka ain kan leh ia kaba donkam pyrshah ia ki briew kiba donkti ha ki kam khaii droks.

Haba kren sha ki lad pathai khubor, u Bah Kyrmen u la ong ba ka ain ka dei ruh ban shim ia ki lad jingpynshitom pyrshah ia kito kiba kynnoh ba u Myntri sorkar u donkti ha ki kam khaii drok khlem kino kino ki sakhi satar.

Haba pynpaw halor ka jingdonkam ban rat dyngkhong ia u drok na ka Jylla, u Myntri u la ong, “Kam long kaba bha iano iano ruh ban shu kynnoh pyrshah ia ki dkhot jong ka liang synshar ne liang pyrshah lane ia ki riew paidbah khlem da don ia ki sakhi satar kiba biang ba u / ka donkti h ki kam khaii drok bad lum pisa lyngba u drok.”

Nalor kata u la bynrap da kaba ong, “Ka long kum ka khana biria bad kum ka jingiakren ha iew ha hat ban shu kynnoh pyrshah ia kino kino ki dkhot ne ki riew paidbah ba ki donkti ha ki kam khaii drok khlem da don ia ki sakhi satar.”

Haba kylli halor ka rai jong u nongialam ka liang pyrshah u Dr Mukul Sangma ban thoh sha u Myntri Rangbahduh ka ri pyrshah ia ka kam khaii drok, u Bah Kyrmen u la ong, “Katkum ka jingsngew ka jong u kane ka long kaba bha eh, hynrei lada ka dei ka jingkynnoh ka bym shisha nga ngeit ba ka iingbishar ruh ka dei ban leh ei ei pyrshah ia kito ki briew kiba shu kynnoh pyrshah khlem da don ia ki sakhi satar.”

U Bah Kyrmen u la ong ruh ba ka nongrim kaba ka sorkar ka ieng ka long kaba shai kdar, kata ba kino kino kiba donkti ha ki kam khaii drok kin ym lait suk.