Ka ain kan leh ia la ka jong ka kamram pyrshah ia ki kam beain ka HNLC; ong u Dy.CM

Syllad | The Rising MeghalayaJune 12, 2024

U Symbud Myntri Rangbah ka Jylla uba khmih ia ka Tnat kam Pohiing (Police) u Bah Prestone Tynsong ha ka 11 tarik Jylliew u la ong ba ka ain kan leh hi ia kaba donkam pyrshah ia ki kam beain jong ka Seng Hynniewtrep National Liberation Council (HNLC).

Kane ka jingpynpaw u Dy.CM ka la wan long ruh shi sngi hadien ba ki bor pulit ki la ioh ban kem noh ia laingut ki dkhot ka ‘sleeper cell ka HNLC kiba donkti ha ki kam dawa pisa bad byrngem ia kiba bun ngut ki riew shimet.

Haba kren sha ki lad pathai khubor, u Bah Prestone u la ong, “Ka ain kan leh hi ia kaba donkam ym tang ia ka HNLC hynrei ia kino kino kiba leh ia ki kam bymman.”

Ha kajuh ka por u la kyrpad ia ka HNLC ba kan sangeh shisyndon ia baroh ki kam beain bad ban wanphai pat sha ka jingiakren iasuk…”Ka jingkyrpad ka jong nga ka long ban sangeh ia ki kam beain bad ki kam bymman bad ban wan shakhmat bad iatreilang bad ka sorkar lem bad baroh lang na ka bynta ka jingshngain bad ka jingkiew jong ka jylla hi baroh kawei.”

U la ong ruh, “Ka long ka jingshisha ba ngi la dep ban kyrpad ia baroh ki nongshong shnong ka Jylla, ba lada don kino kino kiba ioh pdiang ia ki shithi dawa pisa ne shah byrngem byrsit la ha kano kano ka rukom ki dei ban pyntip sha ki bor pulit khnang ba kin lah ban leh mardor ia kaba donkam.”

Haba kylli u Dy.CM u la ong ba ka sorkar ka la pynpaw shai kdar ba ka long pyrshah ia kino kino ki kam beain bad ki kam bymman.

Nalor kata u la ong, “Ha kawei pat ka liang, Nga dang iai kyrpad na ka por sha ka por ba ka jingkhang na ka bynta ka jingiakren ka dang iai plie kumba ngi la ju leh naduh kham hashwa na ka bynta ki dkhot ka HNLC. Kumta sa shisien pat Nga buh ka jingkyrpad ia ka Seng hi baroh kawei ba kan wanphai biang sha ka jingiakren kumba ngi la dep ban sdang bad ai kan bteng haduh kaba kut.”