Ka AITC ka la dei ban jop ha ka bye election ha Gambegre; ong u Dr Mukul Sangma

Syllad | The Rising MeghalayaDecember 5, 2024

U nongialam ka AITC uba dei ruh u Myntri Rangbah barim u Mukul Sangma ha ka 4 tarik Nohprah u la kam ba jin da la kam dei satia ka elekshon shiteng samoi, ka party jong u ka la jop ia ka Gambegre seat.

“Lada kane kam dei satia ka elekshon shiteng samoi, ngin jin da la ioh ia ka jingjop ha Gambegre,” ong u Mukul haba kren sha ki lad pathai khubor.

Lah ban kdew ba ka kyrtong ka AITC ka Sadhiarani Sangma ka la shah rem noh ha ka kurim u Myntri Rangbah ka Dr Mehtab Chandee A Sangma ha kane ka elekshon shiteng samoi kaba dang shu dep pynbna shen ha Gambegre, ha kaba ka Sadhiarani ka la ioh tang 8084 vote.

Haba kylli, u Mukul u la ong, “Kam dei satia kaei kaba bakla. Phi la dei ban pyrshang ban wad  kumno ka la jia. Nga iehnoh ia kane ka jingkylli tang haphi. Wat shwa ban pynlong ia kane ka elekshon ruh phi la iohi ia ka jingsam ia ki tin sop iing sha ki nongshong shnong, kata ba phin tip kaei kaba la jia, hynrei kan bha ba phin leh ia ka postmortem khnang ba phin ioh ia ki jingtip kiba kham bha ia kaei kaba la jia, bad kumno ka dur jong ka synshar paidbah, kumno la pyndonkam bakla ia ka bor kynthup da kiwei pat ki lad ki lynti kiba la ktah shisha halor ka jingmih lyngba kane ka elekshon.”

“Kine ki dei ki mat kiba ai ia ngi ka jingshemphang halor ki jingeh baroh kiba iadei bad ka synshar paidbah kaba ngi iakynduh da kaba buh ia ki jingmut ia ka rukom iaid jong ka kam sain pyrthei ha kine ki snem kiba mynta,” ula ong.

Kaei kaba phi iohi ha kine ki 20 snem kiba la leit noh bad kaei kaba phi iohi mynta, ka jingkylla jong ka sain pyrthei ha kaba iadei bad ka jingiajied ka la shah banbor ha ki rukom bapher bapher ha kaba ki party sain pyrthei ki la pyndonkam ia la ki jong ki buit. Kumta kine ki dei ruh kita ki jingma bad nga la shimkhia halor kine khnang ba ngin tip kumno ban leh,” u la ong.