Ka All Souls’ Day ha Jowai

Syllad | The Rising MeghalayaNovember 2, 2022

Kumba ju long man la u snem ka balang Katholik, St. Theresa Cathedral Church, Jowai Parish kala rakhe iaka All Souls Day ha u lum jingtep jong ka Balang Katholik haka sngi Balang.

Ha kane ka sngi, la kynmaw burom ia ki mynsien ki ba la khlad noh da ka jinglehniam ka Mass Bakhuid ha ka jinglamphrang da u Administrator ka Jowai Diocese, Rev. Fr. Ferdinand Dkhar ha ka jingiadonlang Rev. Fr. Hilarious Lamare bad Rev.Fr. S. Sungoh.

U Administrator jong ka Jowai Diocese Rev. Fr. Ferdinand Dkhar u la ong ba ym tang ba ka dei ka sngi kynmaw ia kiba la khlad hynrei ka dei ruh ka sngi ban duwai bad ka jingburom ia ki.

“Ka jingim jong ngi ha pyrthei, kam kut tang shu la khlad noh, hynrei ka don kata ka bynta kaba ngi ong ka jingduwai pynbiang, ka jingduwai pynkhuid bad ka balang kristan jong kiba la jop” ong u Rev. Fr. Ferdinand.

“Kane ka dei jingleh burom bad ka jingieid jong ngi kum ba U Jisu hi u la kular ba ma ngi, ha kawei ka sngi U la leit ban pynkhreh jaka na ka bynta jong ngi, ngin sa don lang bad U, kane ka jingduwai jong ngi na ka bynta kiba khlad ka long shi bynta ban pynkhuid, ban pynbiang ialade khnang ba ngin dup snoh lang bad ki angel riewkhuid ha bneng bad lyngba ka jingduwai jong ngi kin sa ioh kata ka jingjah thiah bymjukut bad ka jingim bymjukut ha bneng” ong u Administrator ka Jowai Diocese, Rev. Fr. Ferdinand Dkhar.

Ha ba kut jong ka jinglehniam ki lai ngut ki lyngdoh niam ki la shim iaka bynta ban synreit da ka um kyrkhu ïa u lum jingtep ha katba kiba haiing hasem ki ia lum lang khrui jar la ki jingtep jong kiba ki don jingiadei ban buh haki jingduwai.

Hashwa kane ka jinglehniam ki para bangeit ka balang Katholik kila shimbynta da kaba leit buh syntiew ban kynmaw burom ia kiba ieit kiba thoin kiba la khlad noh na kane ka pyrthei.