Ka BCCI ka lah ban ïarap tei ïaka stadium ïalehkai Cricket haka Jylla: Saba Karim
SHILLONG: U Syed Saba Karim, General Manager Operation jong ka BCCI u la wan hiar ha nongbah Shillong ban jurip naka bynta ki kato katne ki kam, kiba ka Meghalaya Cricket Association (MCA) ka la pyntrei kam ïa ki skhim ba la ïarap ban bei pisa ïa ka da ka BCCI haka sngi Saitjaiñ.
La pdiang sngewbha ïa u Karim da u Hony. Secretary ka MCA u bah Gideon L. Kharkongor ryngkat ka jingïadon lang ki nongïalam barim ka synjuk kum ki jong u Naba Bhatacharjee, Andrew Warjri, Saibal Das Gupta bad kiwei kiwei.
![](https://www.syllad.com/wp-content/uploads/2024/09/JIT-Vacancy-823x1024.avif)
Kum ka dak ka jingpdiang burom, ka MCA ka la ai sngewbha ruh ïa ki song sha u Karim, uba na ka por sha ka por uba la shah shkor bha ïa ki jingeh kiba kum ka synjuk ka juh ïa shem bad kynduh mynba ba ka dang pyrshang ba kan ïoh ba kan rung sha ka thup ithuh kaba puira jong ka BCCI.
Ki mat kiba u Karim u la ban jur bha ïaki nongialam ka MCA ka dei ban teh lakam, peitngor bad husiar bha ïa ka jingthok palat liam ïa ka rta jong ki khynnah ïalehkai. Ula ong ba ka BCCI ka la pyrshang ba kan thaw ïa ki aiñ ki kyndon kiba pyrkhing bha ban tehlakam ïa kane ka jingthok jong ki samla ïalehkai kriket ha ka ri ha kaba ïadei bad ka rta.
Ula kyntu ruh ïaki nongkit kam jong ka MCA ban pynkloi ha kaban ai ïa ka bainong ïalehkai kaba dei hok jong ki samla ïalehkai, da kaba kin bud ryntih ïa ki kyndon kat kumba la pruid dak ïa ka da ka BCCI.
U Karim um lah ruh ban khlem da pyrto ïa ka jingtbit bad pnah bha ka rukom pynïaid kam pynïaid jam ka MCA bad ula pynpaw ka jingsngewhun halor ka jingwan hiar jong u sha Shillong ban ïohi da ki jong ki khmat ïa ka jingtrei shitom ka MCA bad pyntrei kam hok ia ki skhim ïarap ba la noh synñiang da ka BCCI.
U Karim ula ong ba ka BCCI ka don ki lad ki lynti ban ïarap tei iaka stadium ialehkai Cricket ha ka jylla, hynrei donkam pat ban pule bad bud ïa ki kyndon ba la pruid dak ïa ka da ka BCCI.
Leave a Reply