Ka Behdeinkhlam ka Seinraij Kongwasan Chyrmang haka 26-28 tarik Iaiong

Syllad | The Rising MeghalayaApril 24, 2024

Ka Seinraij Kongwasan Chyrmang kumba ju long man la u snem ha une u snem ruh kan pynlong iaka lehniam Behdeinkhlam ka ban sdang naduh ka 26 tarik haduh 28 tarik Iaiong ha madan Seinraij Chyrmang.

Kumban shu iathuh ba ka Behdeinkhlam ka Chyrmang ka dei kaba nyngkong eh kaba pyndep ha Rilum Jaintia, hadien bud sa ka raij Jowai bad Tuber.

U Secretary ka Seinraij Kongwasan Chyrmang Bah Kerlang Lakiang haba iakren sha ki lad pathai khubor, ula iathuh ka Behdeinkhlam ban pyndep da ka Seinraij Kongwasan Chyrmang kadei ka Behdeinkhlam kaba nyngkong eh hapoh rilum Jaintia.

Ula ong ruh ba ka Behdeiñkhlam ka dei ka jinglehniam ha shwa ba ki khun ka Raij kin hiar sha ki hali ki lyngkha jong ki ban pynhap ia u symbai u phniang ne ban bet ia u kba u khaw, kumjuh ruh khnang ba un bha un miat u kba u khaw ban dap ban biang ka iing ka sem.
Ha ka jingiadei bad kane ka lehniam shad Behdeinkhlam, ka Sein Raij Chyrmang ka khot bad wer sngewbha ia baroh ki khun ka Raij bad kiwei dei naduh kiba najan bad najngai ban wan sakhi lang ia kane ka lehniam.

Khyndiat shaphang ka lehniam Behdeinkhlam jong ka Seinraij Kongwasan Chyrmang, la sdang iaka haka 26 tarik Iaiong da ‘Chad Iung’ baroh shimiet haduh ka step 27 tarik.

Haka step 27 tarik haka por 6.00 baje ki samla Rangbah naki artylli ki dong ka Chyrmang Nein bad Chyrmang Wah kila jied iaki samla Rangbah na ka bynta ban leit wad iaki dieng blai lane ‘Charoh blai’ bad ban pynpoi pat iaki shiteng sngi haki jaka bala pynmlien ki longshwa manshwa.

Ka Chyrmang Nein kan pynpoi iaka dieng blai haka jaka kaba khot ‘Moo tymmen’, katba ka Chyrmang Wah kan pynpoi iaka dien blai haka jaka kaba khot ‘Khang khrong’.

Hadien ba ki ar dong ki la pynpoi iaka ‘Charoh blai’, u Lyngdoh Kongwasan ka Raij Chyrmang ryngkat ki sangot, ki chutia, ki tymmen ki kro un leit shaw iaka Dongnein ryngkat ka nguh ka dem, ka suit ka shor ban pynpoi pat iaka ‘Charoh blai’ shajan ka Aitnar. Ha kajuh ka por ka dongwah ruh kan pynpoi iaka Charoh blai ha jaka kaba ki khot ‘Pdengyutang’.

Haka por kumba 4 baje janmiet, la pyndep pat iaka lehniam ‘Boh synrum’ kaba dei kawei na ki lehniam kaba u Lyngdoh bad baroh ki Wasan ryngkat u Chutia un rah iaka ‘Bhang’ ban boh iaki “Dieng Synrum’ kaba long haka dur jong ka khlam.

Haka 28 tarik dangstep phyrngap la pyndep pat iaka lehniam ‘Chad Iung’ ryngkat ki wasan bad u Langdoh da kaba sympat iaki iing ki sem da u siej ryngkat ka nguh ka dem ban ioh iaka jingkoit jingkhiah jong kato ka iing ka sem napoh ka shnong ka raij.

Hadien ba la pyndep iaka ‘Chad iung’ haka por kumba 12.00 baje mynsngi ki ar dong kin leit rung ha iing Langdoh ryngkat ka nguh ka dem bad hadien kane la pyndep pat iaka ‘Seh bhang’ ha Khloo blai ryngkat ka nguh ka dem ka suit ka shor ban khang ban kah iaka khlam ka dait ba kan rung shapoh ka shnong ka raij.

Hadien ka ‘Seh bhang’ haka por kumba 1.30 baje nohphai sngi, ki ar dong kin pynkhein ia u ‘Khnong blai’ bad hadien kane ki ar dong kin pynhiar iaki ‘Charoh blai’ sha Aitnar. Hadien ba la dep ban pynhiar iaki ‘Charoh blai’ ki khun ka raij kin pynhiar pat iaki rot ki rong hapoh Aitnar.

Hashwa ban bret iaki rot ki rong, haka por kumba 3.50 baje janmiet kala don sa ka iatan hapdeng u Sangot bad u Langdoh ryngkat ka nguh ka dem bad ka suit ka shor.

Hadien kane la pyndep ruh iaka lehniam ‘Iadaw charoh’ ryngkat ka nguh ka dem ka suit ka shor bad la pyndep ruh iaka jingdain lane pom iaki khlieh Charoh blai na ka bynta ban leit bret shaki jaka ba la pynmlien ki longshwa manshwa.

Iaka khlieh dein blai jong ki Chyrmang nein yn leit bret sha Chyrmang wah, katba iaka khlieh dein blai jong ka Chyrmang wah yn leit bret sha Chyrmang Nein.

Hadien kane ka la don pat ka lehniam ‘Knia khlam’ ba la pyndep da u Langdoh bad u Chutia ha kaba ka kyrteng jong ka kniam khlam kadei ka ‘Iaknieh Yandem’.

Hadien kane u Chutia ryngkat u Tymmenkhlem kin pyndep iaka ‘Khum Yutang’ kaba dei ka lehniam khatduh jong ka Behdienkhlam da kaba khang iaka khlam khnang ba kan lait ban rung shapoh ka shnong ka raij.

Haka step 30 tarik u Langdoh ryngkat ki khun ka raij kin leit ban pynhap ia u symbai u phniang sha ki hali ki pynthor ryngkat ka nguh ka dem ban seisoh u khaw u kba ban dap ban biang ki khun ka raij baroh shisnem lynter.