Ka Behdeinkhlam Tuber kan sdang naduh 14-17 Naitung, ka thong ban wanrah iaka jingiatylli bad burom markylliang bad pynduh iaka jingsngewniam

Syllad | The Rising MeghalayaJuly 13, 2023

Ka Behdeinkhlam kaba heh tam ha Rilum Jaintia kaba pynlong man la snem da ka Seinraij Tuber kan sdang naduh 14-17 tarik Naitung ha Tuber Kmaishnong. Ka thong jong ka kalong ban pynduh iaka jingsngewpher niam bad ban wanrah iaka jingtylli hapoh ka Bri U Hynniew Trep Hynniew Skum.

U Ma Harvis Phawa President jong ka Seinraij Tuber ula iathuh kumba ju long ka rukom ka Behdeinkhlam kan long haki saw sngi lai ia ban kyrpad kyrpon ia u nongbuh nongthaw ban beh sha jngai iaka khlam ka ngoh bad ba un ai ka iaka koit ka khiah, ka roi ka par hapoh ka raij baroh salonsar.

U Ma Harvis ula iathuh ia kane haka jingiakren bad ki nongthoh khubor haka 12 tarik Naitung ha Central Café, Lathadlaboh, Jowai haka jingiadonlang ki nongkitkam naduh u General Secretary Ma Jolby Sana, Ma Bewill Shylla Adviser, u Ma Helping Phawa Adviser, u Ma Joining R Dkhar Assistant General Secretary, Ma Jointly Ksoo Finance Secretary bad Ma Poli Sana Assistant General Secretary.

Ula ong ba Behdeiñkhlam ka long ka jinglehniam jong ki jaidbynriew Pnar ha Rilum Jaintia hadien bad ki khun ka raij ki la dep ban bet bad thung ia kba ha lyngkha.

Ka Behdeinkhlam ka dei ka jinglehniam ban shad kmen ryngkat ka Kñia ka khriam, nguh dem bad ka suit ka shor.

Ha Raij Tuber, u Longdoh dei u khlieh ka niam bad u pyndep iaka niam ryngkat ka jingiadonlang ki Wasan Raij, Sangot, Maji, Chutia, Dhulia, Kitkhoh bad Tymmen Raij.

Haduh 64 tylli ki rong na ki 30 tylli ki shnong kiba na East Jaintia Hills 19 tylli ki shnong bad West Jaintia Hills 11 shnong kin wan ban iashimbynta haka Behdeinkhlam.

U kongsan u ban wan sakhi ia kane ka Behdeinkhlam u dei u Deputy Chief Minister ka Jylla, ma Sniawbhalang Dhar, ki MDC JHADC, ki ophisar sorkar bad kiwei kiwei kiba shah khot sngewbha.

Ka jinglehniam Behdeinkhlam jong ka Seinraij Tuber kan sdang naduh ka sngi Pynsin (14 tarik Naitung) ha kaba ka phang Wah kin kiew sha ka phang Neiñ ryngkat ka shad ka kmen. Kaba mut ba ki riew ngeit Niamtre kiba shong basah ha ki thaiñ ba sharum ‘wah’ ki wan kiew sha ka ka bynta ba shaneng shnong ban ïa khublei ha ryngkat ka niam ka rukom.

Haka sngi kaba bud ka Mulong (15 tarik Naitung) pat ruh kumjuh kumba la leh haka sngi kaba nyngkong kala don ka jingïaleit khublei kaba ki khot ka ‘hiar wah’. Ha kane ka kynti pat kiba naka phang ba shaneng ki hiar sharum ‘wah’ bad pyndep ïaka nguh ka dem bad ‘i pyrnah pyrjiñ’ kaba dei ka sadhiar ne Ïndem kaba la pynkyntang ha u klong sko.

Haka sngi kaba lai, Musiang (16 tarik Naitung) dang step naduh ka por 5 baje u Longdoh rynkat bad ki Wasan Raij kin pyndep ki iaka Kñia Syiem Ryngkaw ha Mukoi Ryngkaw.

Hadien bala dep Kñia bud saka Rah Bhang Blai bad ka Chooh Thyndai. Iaka Chooh Thyndai hap pyndep ha shwa ban beh iaka khlam da u Longdoh bad ki Wasan Raij.

Haka sngi khatduh ka Behdeiñkhlam kaba dei ka Muchai (17 tarik Naitung) dang step 5 baje u Chutia un hap ban pyndep iaka Niam Kñia beh khlam. Haka por 11 waje pat u Longdoh bad ki Wasan kin ban ai Klong Pyrnah sha ki dong ki shnong kiba shna Rong bad ki Seiñraij Shnong bapher bapher.

Hashuwa ban bret iaki rong kan don sa ka niam Yabooh bad Yatan Bhang Blai.  U bhang u dei u dieng uba don ar pnat uba ki pyndonkam pat ha ka rukom kaba ki khot ka ïatan bhang. Ka ïatan bhang ka ïasyrïem ïaka Dat Lawakor ha ka Behdieñkhlam ka Raij Jowai ha kaba un bha u kba u khaw sha ka liang kaba jop ha kata ka jingïatan.

Yn pynkut iaka Behdeinkhlam da kaba jingiasleit ne ialympat Niam hapdeng ki ar ngut Rang kynsai ka Phang Wah pyrshah iaki Rangkynsai ka Phang Ñein.

Ka Seinraij Tuber ka kot wer sngewbha ia baroh ban wan sakhi iaka lehniam Behdeinkhlam jong ka raij ban ialehkmen lang bad ban burom mar kylliang bad khlem kano kano ka jingsngewniam na ka bynta ban pynneh pynsah iaka kolshor bad riti dustur.