Ka Behdieñkhlam: Samoi ki sur kynud ka ksing ka tangmuri ban wanrah ia ka jingiatylli

Syllad | The Rising MeghalayaJuly 10, 2019

Ki sur kynud ka ksing ka tangmuri ka la sdang ba la wan biang ka por ka samoi jongka shad niam Behdeiñkhlam hapoh ka shnong Jwai ha kaba ki khun ka ñiamtre kiba dang bat bad bud ia ka ñiam ba lasuit lashor da u mynbarim u longshwa manshwa (Niamtre) ki la sdang ban ia bun kam ha ka ban pynkhreh pynkhrum ha la ki jong ki jong ki iing ki sem, ki dong ki shnat khnang ba ki sngi ki ia jongka shad Behdeiñkhlam kin long ki ba iaid beit iaid ryntih bad I phuh I phieng hapdeng ka jingshongkun shongblei.

Ka hukum, adong niam ka ong, kane ka dei ka jingshad bashisien shisnem ha kaba u Tre-kirot ryngkat ki Sangia Saret kin wan ban iadonbyntalang naduh kasngi ba sdang Pynsin haduh kasngi Muchai badei ka sngi ban pynkut ia ka shad ha Syiem aitnar. U Tre-kirot na ka bynta ban long kane ka shad niam Behdeiñkhlam ka ba shongkun shongblei, u la adong lypa ia u Niaw-wasa Niaw wasung, khun Niewtrep niewskum ba u dei ban long u ba shad hok da ka mynsiem tipbriew tipblei hajrong ka maw ka dieng, ka biar ka ktieh ryngkat ki sur kynud bamih na ka ksing bad tangmuri.

Haba sakhi ia kane ka shad Niam Behdeiñkhlam na kipor sha ki por haman ki shnong ki raij lashem wat la ka dei ka jingshad baiaid ryngkat ryngkat bad ka niam ka rukom kam long pat ka jingshadniam kaba khanglad ia kiwei ki paralok kiba wan na kiwei ki shnong ki thaw ne na kawei ka jingngeit niam bad kane hi ka pyni ba kane ka shad niam Behdieñkhlam lah ban ong ka dei ka shad bapyni bad tehsong ia ka jinglong kawei bad iatylli wat hapdeng ki jingiapher ha ki bun rukom.

Mynta u snem hapoh ka shnong Jwai ia kane ka Shad Ñiam Behdeiñkhlam yn sdang naduh ka 11 tarik July (Pynsin) bad kan kut ha ka 14 tarik July (Muchai) bad ha kine ki sngi, ki ia jongka shad ñiam Behdeiñkhlam yn don shibun ki rukom lehniam naduh na ïing nasem kiba hap ban pyndep da u Kñi, ka Kchuu ka siang haduh ha ka Raij ka shnong kiba hap ban pyndep da u Daloi, u Langdoh, ka Langdoh, U Pator, ki Sangot, ki Wasan ryngkatlang bad ki kur balah ban iadonbyntalang ha ki lehniam bad knia ainguh bapher bapher.

Ka bynta ba khatduh jongka shad niam Behdeiñkhlam kan long ha Aitnar ka jaka ha kaba ki dong ki shnong ba iashim bynta ha kane ka shad kin wan ha ryngkat ki rot ki rong ba la shna pynwandur ha ki rukom bapher bapher kiba long ka dak ban pynphuh pynphieng ia ka shad niam ha aitnar bad ruh ban pyni ia ka sap ka phong ki khun ka ñiamtre lyngba ka jingshna ia ki rot ki rong ha ki dur ki rukom bapher bapher kiba lah ruh ban ai ka khubor hakhmat u paid ba bun balang najan najngai ba wan sakhi ia ka shad ñiam ha aitnar.

Khatduh iawai ban pynkut ia ine I jingthoh, kumba ka nongrim hi jong kane ka shadniam Behdeinkhlam lyngba ki jingknia ainguh aidem ia u trai nongbuh nongthaw, ia ki lei shnong lei raij, ki ryngkew ki basa ban kin beh sha jngai ia ka tyrud ka smer, ka sih ka roi, ka pang ka shitom, napoh ki shnong ki Raij kiba wan ban lynshop bad tyllep ia ka ri bad ka jaitbynriew ha ki rukom bapher bapher bad ruh u trai kynrad nongbuh nongthaw un theh, sei ki jingkyrkhu hapoh ka raij ka shnong, ka ri bad ka jaitbynriew ha kaba ki khun ki raiot kin ioh ia ka koit ka khiah, ka roi ka par badap kyrhai ha baroh ki liang.

Da kawei pat ka kyntien ban ong, ka Shad Niam Behdeinkhlam ka pyni ruh hakhmat ka pyrthei ia ka jinglong kyrpang ka jaitbynriew u hynniew trep hynniew skum, kumta ban pynsarong ia ka jinglongkyrpang jong ka Shad Niam Behdeinkhlam, to long ki briew ba iashimbynta ha kane ka shad da ka mynsiem tipbriew tipblei bad ruh ban wanrah bad tehsong ia ka jingsnew burom markylliang para briew wat hapdeng ki jingiapher ha ki bun rukom da ka nongrim ba ong, ieit ia la ka jong bad burom ia ka jong kiwei, lynti ka jingsuk ha pyrthei kan dap kan shlei bad jingkyrkhu u Trekirot un iai theh sei.

“Shad Ñiam Behdeiñkhlam Basuk Bakmen iaphi baroh
Da jingtip briew, tip Blei jingkyrkhu ngin ioh”.

Written by: Solangki D Laloo| Loomkyrwiang| Jowai