Ka BFI East Zone Men’s Boxing Championship, 2023 kan long ha Ri Bhoi

Syllad | The Rising MeghalayaAugust 4, 2023

Ka rynsan ia kob ia kura kaba la tip kum ka Boxing Federation of India (BFI) East Zone Men’s Boxing Championship, 2023 kan long haka 17 haduh ka 19 tarik une u bnai Nailar 2023, ha madan  Kurkalang, Bhoirymbong, Ri-Bhoi District.

Mynta ka kynti ia kane ka jingiakop la shimti ban pyniaid da ka Ri-Bhoi Boxing Association ryngkat ka jingiatrei lang bad ka Meghalaya Boxing Association (MBA).

Haba iadei bad kane, na ka liang ka Ri Bhoi Boxing Association, ryngkat ka Meghalaya Boxing Association kila iakynduhlang bad iakren bad ki lad pathai khubor ha Mawlai mawroh Indoor Stadium.

Ha kane ka jigiakren la iadonlang u bah Cornelius Kharhunai, u bah  Dondor Marwein bad u bah Daniel Marbaniang kiba long President, Secretary bad Treasurer jong ka MBA, u Teibor Pathaw bad u Roges Synrem. Laiadonlang ruh ruh u Technical Director ka MBA bad u Jt Secretary ka BFI u bah Larry Kharpran.

Na ka liang u bah Cornelius, u iathuh ba ha kae ka kynti kaba mynta, yn don saw tylli ki jylla kiban wan ban iashim bynta sha kane ka jingiakob, bad kine ki kynthup ia ka  Sikkim, West Bengal,  Assam bad Meghalaya.

Katba na ka liang u bah Larry Kharpran Technical Director ka MBA bad u Jt Secretary ka Boxing Federation of India, ula ong ba kane ka dei ka sien kaba ar ba yn lah ban wanrah ia kane ka lympung hangne hapoh kla jylla bad ka sien kaba nyngkong dei ha u snem 2019.

Ha kane ka kynti kaba mynta, ka jigiakob kan don haduh 9 tylli ki weight category 48 kilo haduh 75 kilo.

U bah Larry u pyntip ba ha kane ka kynti kaba mynta, ka MBA ka la buh ia ka prokram ban jied ia la ki jong ki samla ia kura kiban khreh ban kiew rynsan bad ban aireng  ha kane ka jingiakob, kaba la sdang naduh ka 2 tarik bad ba la pynkut noh haka 4 tarik. Ula ong ba ki rang ia kura kiba la shah jied, ka MBA kan bteng ba kan ai ia ka jinghikai ne ka coaching kaban neh pat haduh ka 15 tarik mynta u bnai.