Ka BJP bad ka Congress kin ym lah satia ban iatreilang; ong u AL Hek

Syllad | The Rising MeghalayaNovember 7, 2024

U Nongialam ka BJP uba dei ruh u Myntri Sorkar Jylla u Bah AL Hek ha ka 6 tarik u Naiwieng u la ong ba ka BJP bad ka Congress kin ym lah satia ban iatreilang da lei lei ruh.

“Ka Congress bad ka BJP kin ym lah satia ban iatreilang. Kumno phi lah ban ong kumta? Hato u Myntri Rangbah duh jong ngi u lah ban ïatreilang bad u Rahul Gandhi?” ong u Bah Hek haba kren sha ki lad pathai khubor.

Ia kane u Bah Hek u la pynpaw halor ki jingkynnoh jong ka National People’s Party (NPP) ba ka jingshim rai jong ka BJP ban pyniasoh ha ka jingiakhun ha ka elekshon shiteng samoi ha Gembegre kan ktah tang ia ka Congress namar ba ki iatreilang ban pynjop ia u MP ka Tura u Saleng A Sangma ha kane ka MP elekshon kaba la dep.

Haba kyntait ia kane, u Bah Hek u la ong ba ka BJP kam shym la don bynta ei ei ruh ba ka Congress hapoh Rilum Garo.

“Ka Congress ka don la ka jong ka jingithuh, la ki jong ki nongkyrshan bad la u jong u kyrtong bad ki dei ban iakhun ia ka elekshon ha la ka jong ka bor. Kumjuh ruh ka BJP ka don la u jong u kyrtong, la ki jong ki nongkyrshan bad ngin iakhun ia ka elekshon da lade hi,” u la bynrap.

Une u nongialam ka BJP u pynpaw ruh ka jingsngew skhem ba u kyrtong ka party uba dei ruh u MDC ka Tura u Bernard N Marak un lah ban jop ia ka Gembegre seat.

“Ka mat jong ka BJP ka dei tang ka roi ka par. Lada ki paidbah ki jied ia ka BJP, kiba bun ki kam pynroi kin wan hapoh ka constituency.. ki don shibun bah ki skhim ba la pyllait da u Myntri Rangbahduh ka ri,” u la ong.

Haba kylli, u Bah Hek u la ong ba ha ka elekshon sha ka Parliament, ka BJP ka la ai ka jingkyrshan kaba pura ia ka NPP hynrei kam shym la ai ha ka elekshon shiteng samoi ka ban wan ha Gambegre ban. “Ngim don ei ei ban ong pyrshah ia kano kano ka seng sain pyrthei (halor ka jingkynnoh ba ka BJP ka la pynsniew ia ka kabu jong ka NPP ha ka elekshon MP ba la dep),” u la pynpaw.