Ka BJP ka don ha ka jingiakhun ban jop ia ka by-election ha Gambegre: AL Hek

Syllad | The Rising MeghalayaNovember 12, 2024

U nongialam ka BJP uba dei ruh u Myntri Sorkar u Bah AL Hek ha ka 11 tarik mynta u bnai u la pynpaw ia ka jingsngew skhem ba ka party jong u kan lah ban lehbha ha kane ka elekshon shiteng samoi ha Gambegre ka ban long ha ka 13 tarik u Naiwieng 2024.

Haba kren sha ki lad pathai khubor, u Bah Hek u la kam ba ki jingialang ialap elekshon jong ka party kaba u la leit ruh ki long kiba shongshit bad kiba paidbah briew.

“Da kaba phaikhmat sha ki paidbah kiba wan sngap sha ki jingialang ialap elekshon jong ka BJP, kane ka pyni ba ka BJP ruh ka don ha ka jingiakhun ban jop ia ka Gambegre seat,” u la ong.

U Bah Hek u la ong ruh ba kam don kano kano ka jingkylli ba ka BJP ba ka NPP ki la iatreilang ha kane ka elekshon namar ki la iakhun ha la ka jong da kaba pynieng ruh ia la ki jong ki kyrtong.

Watla katta u la pdiang ba baroh ki seng sam pyrthei kiba iakhun ki dei kiba khlain na ka bynta kane ka elekshon ha Gambegre.

Ha kajuh ka por une u nongialam ka BJP u la ong ba ka party ka dei ban iakhun ia baroh ki elekshon, kata la ka dei ka MP, MLA ne MDC. U la ong ruh ba shen ka party kan sa jied ia ki kyrtong na ka bynta ka elekshon sha ki Autonomous District Council hapoh Rilum Khasi bad Jaintia.