Ka BJP ka don ia ka lad ban jop ia ka bye election ha Gambegre; ong Bah Hek

Syllad | The Rising MeghalayaNovember 22, 2024

U nongialam ka BJP uba dei ruh u Myntri sorkar u Bah AL Hek ha ka 21 tarik u Naiwieng u la pynpaw ia ka jingsngew skhem ba ka party kan ioh ia ka jingjop ha ka elekshon shiteng samoi ha Gambegre, ha kaba ia ka result yn sa pynbna ha ka 23 tarik u Naiwieng.

Ka BJP ka la pynieng iakhun ha kane ka elekshon da u Vice President ka jylla uba dei ruh u MDC ba mynta ka Tura u Bernard N Marak kum u kyrtong.

U Bah Hek u la ong ba ki briew ki la pyni ia ka jingangnud ban wan bad sngap ia ki nongialam ka BJP ha ka por ba pynlong ia ki jingialap elekshon ha katei ka constituency.

“Ngam tip ia kiwei pat ki party sain pyrthei, hynrei na ka bynta ka BJP haba nga leit sha ki jingialap elekshon ha Gambegre sha kino kino ki jaka ba pynlong ia ka jingialang paidbah nga la iohi ia ka jingangnud jong ki briew ban wan sngap ia ki jingialap jong ka Seng BJP.”

“Nga kyrmen ba haba ki wan beit bad la ki jong kiba haiing hasem lem bad ki paralok para jor bad ki para marjan jong ki baroh, kumta ruh ka BJP ka don ia ka lad ban jop ha kane ka elekshon,” u la bynrap.