Ka BJP ka donkam ban pynkylla ia ki buit treikam ha Meghalaya: Kharkrang

Syllad | The Rising MeghalayaNovember 24, 2024

U Nongaiktien ka BJP u Bah Mariahom Kharkrang ha ka 23 tarik Naiwieng u la ong ba ka party BJP ka donkam ban pynkylla ia ki buit treikam jong ka hapoh Meghalaya.

Kane ka jingkren ka jong u ka la wan long hadien ba ka BJP ka la shah rem kput ha ka elekshon shiteng samoi kaba dang shu dep ha Gambegre, ha kaba u kyrtong jong ka uba dei ruh u MDC ba mynta Bernard N Marak u la duh security da kaba ioh tang 710 vote.

Haba kren sha ki lad pathai khubor u Bah Kharkrang u la pdiang ba ki don shibun ki jingbakla na ka bynta ka party. U la ong ba ka la dei ka por ia ka party ban ialeh pyrshah halor ki jingkynnoh pyrshah kiba iadei bad ki kam niam kaba la treikam pyrshah ia ka party ha ka por elekshon.

“Mynta ka sienjam kaba bud ka long, ngi hap ban shong bishar bniah bad wad ia ki jingbakla bad lehse ngi lah ban pynkylla noh ia ki buit treikam jong ngi, kata kumno ban ialap elekshon ha Meghalaya namar bunsien man la ki elekshon ki ju mih ki jingkynnoh kiba iadei bad ki kam niam bad mynta ngi hap ban leh ei ei pyrshah halor kane. “Ngi la pyrshang ha ka elekshon ha u 2023 hynrei nga harai ki don shibun kiei kiei kiba ngi hap ban leh,” u la ong.

Haba kylli, u nongaiktien u la ong, “Ki don shibun ki kam na ka bynta jong ngi ba ngin hap ban leh namar haba phi kren iano iano ruh, baroh ki mynjur ba lada wan ka sorkar BJP, ki kam pynroi kin wan, kin don ki kam pynroi namar ki la bishar halor kumno ka jylla jong ngi ka roi haba ia nujor bad kiwei pat ki jylla. Hynrei haba la poi ha ki bynta ba khatduh shwa ka elekshon bad hashwa ban leit sha ka jingiathep vote, kumta ruh ki ju mih ki jingkynnoh kiba iadei bad ki kam niam.

“Kumta kane ka la iaid mynta la slem bah bad nga tharai mynta na ka bynta ka elekshon ka ban wan ngin hap ban wad ia ki lad ki lynti kumno ban ialeh pyrshah ia kiba kum kine,” u la bynrap.