Ka BJP ka thrang ban pynkylla ia ka Constitution jong ka Ri, kan ym jop palat ia ka 200 seat: Pala

Syllad | The Rising MeghalayaMarch 27, 2024

U Nongialam ka Congress uba dei ruh u MP ka Shillong u Bah Vincent H Pala haka 26 tarik Lber, ula ong ba ka Seng BJP kan ym jop palat ia ka 200 Seat ha kane ka MP Lok Sabha Ilekshon ka ban wan.

Nalor kata u la kynnoh ruh ba lada ka BJP kan ioh 370 seat, kin sa pynkylla ia ki Riti synshar khadar jong ka Ri ne Constitution da kaba weng noh ia ka kyntien ‘Secularism’ khnang ban pynurlong ia ka jingangnud jong ka ban pynurlong ia ka ri jong ki Hindu.

Haba kren sha ki lad pathai khubor hadien ba la pyndep ia ka jingthep kyrteng, u Bah Pala u la ong,  “Kat haduh mynta, ka BJP kam pat pynbna ia ka thup kyrteng kaba saw. Balei? Namar ka jingialeh kaba don hapoh. Kumta ka jingkylli ba kan jop palat ia ka 200 seat ka dei ka jingkylli kaba khraw shibun na ka bynta jong ki namar ba kim don satia wat ia ki kyrtong ha ki Jylla kum ha Meghalaya bad ha ka thain Shatei Lammihngi (North East). Kumno phin khmih lynti ia ki ba kin jop? Ka dei tang ka buit ban pynbiej ia u paidbah.”

Nalor kata u Pala u la ong ba ka BJP ka la ioh 303 ngut ki MP ha kane ka samoi kaba la dep, hynrei ha kane ka samoi kaba mynta kan hiar shibun hapoh Maharashtra, Karnataka, Delhi, Bihar, Punjab, UP, Himachal Pradesh bad ha kiba bun kiwei pat ki Jylla. U la ong ruh ba sha South ka don palat 130 ngut ki MP, hynrei ha kan ka kynti kaba mynta ka Congress kan kham jop bun ki seat.

Da kaba pynpaw ba ka jingkam jong ka BJP ba kan ioh haduh 400 seat ha kane ka kynti kaba mynta, kane ka dei tang ka jingpynsawa ban pyni dak sha ki paidbah jong ka ri India.

“Ngi don 540 ngut ki MP.Ban pynkylla ia ka Constitution jong ka Ri, ka BJP ka donkam 362 ne haduh 370 ngut ki dkhot. Dei na kane ka daw ba ki pynbna ia ka 370. Kaei ka jingmut jong kane ka 370, ka 370 kaba ki pyni dak ka dei ka jingmaham ia ki paidbah jong ka ri India bad lada ki ioh 370 ngut kin pynkylla ia ka Constitution? Ka kyntien Secularism kan sa shah weng noh napoh ka Constitution,” ong u Bah Pala.

“Lada ia ka kyntien Secularism la weng noh na ka Constition, kumta ruh kan long kumba long ha Pakistan.Ka Pakistan ka dei ka ri Islamic, ka Bangladesh ka dei ka ri Islamic, ka Iran ka dei ri Islamic, kumta hato ngin long kum ka Pakistan, kino kino kiba mane ia kiwei pat ki jingngeit niam kin kylla long beain. Kane ka dei ka jingthmu bad ka jingpyrta ia ka 370-400. Ki tip ba kin ym ioh ia kane hynrei ki la pyrshang ban pyniapait iapra, kin leh beit ia kane, kin pynlong ia ka India ka ri jong ki Hindu, kata ka dei ka jingphohsniew jong ka BJP,” u la bynrap.

“Nga thikna ba bun na phi phi dei ki Hindu, kiba bun na ki paralok jong ngi ki dei ki HIndu hynrei ngi kwah ia ka jingsuk hapoh ka ri, ngi kwah ia ka ri ka ban lait na ka jingshah banbor, ngi kwah ia ka ri ka ban lait na baroh ki jingeh kumba la sakhi ha Pakistan, Bangladesh bad kiwei pat,” u la ong.

Haba kynnoh ba ka jingiashrut mynta ka la jur bha hapoh jong ka BJP, u Bah Pala u la ong, “Ki la don ia ka jingangnud kaba jur mynta ka kynti. Phi iohi ba bun na ki MP kiba la rim ki la shah pynduh tiket bad bun ki MLA ruh  kim shym la iohlad satia. Lada phi phai shapoh Maharashtra, lada phi phai sha Madhya Pradesh bad Rajasthan phi iohi ba ki nongialam barim ki la shah kyntait lut, ki la thung bujli da ki nongialam kiba thymmai.”

Haba kynthoh pyrshah ia u Myntri Rangbahduh Narendra Modi, u Bah Pala u la ong, “Sa kawei pat ka bynta kaba kongsan bad kaba long jar jar, phi tip lada ngi tei ia ka iingmane, u phadar lane kino kino ki nongialam niam kin pynkyntang ia ka, hynrei mynta u PM ka Ri tang ban wanrah ka jingiapait iapra ha kaba iadei bad ka Ram Mandir, ha ka jaka jong ki sadhu ba kin pyndep ia ki kamram jong ki la shimti da ki riew sain hima ha ka jaka jong ki. Ka BJP ka la leh ia kaba bakla lyngba ki kam sain hima, kumta kin ym kot satia wat tang ia ka 200 seat.”

Da kaba pynpaw ia ka jingsngew skhem ba un dang bat ia ka Shillong seat, u Bah Pala u la kdew halor ki jingjop jong ka Congress ha kine ki 15 tylli ki snem kiba la leit noh.Hynrei, watla katta u la ong ba ki don shibun ia kiba dang dei ban leh khamtam ba ka Meghalaya ka donkam ia ka kad liengsuin kaba thymmai.

“Ka Congress ka la leh bha ha ka liang ka pule puthi, ka jingpyniasoh ha ka leit ka wan, ha ka kam pateng, ka jingsam ryntih ia ki jingdon jingem. Kumta ki polisi treikam kiba ka Congress ka la shim mynshwa ki iapher shibun na ki polisi treikam jong kane ka sorkar kaba mynta,” ong shuh shuh u nongialam ka Congress.

“Haba khnmih ia ka polisi treikam jong kane ka sorkar kaba mynta, na ka bynta kito kiba riewspah ki la nang riewspah shuh shuh bad kiba duk ki la nangduk shuh shuh, hynrei ka Congress kan ialeh ba peit ia ka jinglong jingman halor ka jingiapher hapdeng uba riewspah abd uba duk bad kan ialeh ban pynduna ia ka jingiapher bad ruh halor ka hok ban pynpaw, ka hok halor ka jingngeit niam bad halor kiwei kiwei pat ki bynta,” ong shuh shuh u Bah Pala.

“Dei tang ma Nga u MP uba la shah pynsyier ha ka BJP bad kiwei pat ki MP, kata la ka long ha Assam, Arunachal Pradesh kiba bun ki la leit namar ka jingshah khroh ne shah byrthen. Ki la phah da ka ED bad ka IT pyrshah ia Nga, hynrei ki paidbah ki ieit bad shaniah ia Nga ha Meghalaya. Nga tip ba nga don hangne namar ki paidbah bad da kaba pynskhem ia kane ha ki jingmut jingpyrkhat, ki paidbah kin shaniah bad ai ka jingkyrshan na ka bynta jong nga,” ong u Bah Pala.