Ka bor kaba palat iaka ktien: Ka lynti iaid kaba ai mynsiem jong u Maimai Laloo

Syllad | The Rising MeghalayaNovember 2, 2024

Ka long ka khubor kaba lam sngewtynnad bad ka jingsngewsarong haba uwei na ki khun ka rilum Jaintia uba tip kum u Maimai Laloo, wat hapdeng ka jingtynjuh ba u ia tyngkhuh haka jingim, ula lap ia ka lynti kaba thymmai kata ka jingieit ia ka jingialehkai bad ka jinglong shlur kaba la pynlong ia u ban ieng hala ki jong ki kjat bad ban iarap ia kiwei.

U Maimai udei u khun ka Kong Rila Laloo bad (L) Balan Lakiang kiba shong ba sah ha Loompyrdi Iongpiah, Jowai.

U Maimai u dei u nongialehkai Armwrestling bad wat la u long uba tlun bad u bym lait kren, u don pat ka sap kaba kyrpang ban iarap ia kiwei pat ki briew kiba pang ba shitom bad ba duna dkhot met.

Ka jingim jong u kam kut tang haka jingialehkai bad kane ka sap kaba kyrpang jong u ban iarap ia kiwei da kaba shna iaki kti ki kjat artificial ba kin ioh iaid biang ban iaid ban ieng.

Ia kane ka kam shna kti shna kjat ia ki briew kiba pang ba shitom ka dei kaba la tip kum ka Prosthic and Ortholic kaba ula ioh jinghikai pyntbit na Tripura. U trei mynta kum Assistant Prosthetics & Orthotics ha Civil Hospital Ialong.

Haba phai sha ka jingim ialehkai jong u, ula lah ban wanrah burom iaka ri India lyngba ka Asian Arm-Wrestling Cup kaba la long ha Mumbai.

U Maimai naduh ba dang khynnah u sngewtynnad iaka kam ialehkai sports, hynrei haki khyndiat snem ula pynbyrnia iaka por kyrpang haka Weightlifting bad Armwrestling kat haduh ba ula iohlad ban mihkmat iaka jylla kumjuh iaka ri India haki kyrdan iakop bapher bapher ba la pynlong hapoh ka Ri kumjuh shabar ka Ri India.

Ki jingiakop iakhun kti kiba kham paw kiba u iashim bynta ki long haka 27th Annual State Armwrestling Championship, ka 40th National Armwrestling Championship kaba la long ha Nagpur ha u snem 2016 bad ha Jammu-Kashmir ha u snem 2023.

Ha u snem 2024 pat u Maimai ula iohlad ban iashim bynta haki artylli ki jingiakop bad mihkhmat iaka Jylla kumjuh iaka ri India kita ki long ka National Armwrestling and Para Wrestling Championship kaba la long ha Maharashtra bad ka Asian Armwrestling Cup kaba la long ha Mumbai naduh ka 25 tarik haduh ka 27 tarik Risaw 2024.

Ha kine ki jingiakop ba u iashim bynta, sngewsarong ban iathuh ba u Maimai ula rah nam rah burom iaka jylla bad ka ri da kaba u ioh iaka Silver Medal ha baroh atylli ki jingiakhun kti.

Ka bor met kaba khlain jong u bad ka jingshlur ula lah ban pyndep ia shibun ki Short Term Course Training kynthup iaka Painting lyngba ka Jeebon Roy Creative Art Academy bad kiwei kiwei kiba u sngewtynnad ban trei bad kyrpang.

U Maimai kum u briew ba don ka sap bad sngewtynnad iaka Armwrestling, u don ka jingthrang jingangnud ban rah nam rah burom iaka ri India haki jingiakop kiba kham heh jong ka pyrthei, kumta u ong ba nangne shakhmat un trei shitom shuh shuh khnang ba un lah ban pynurlong iaka jingangnud ka jong u, kaba long ka burom kaba khraw ia u hakhmat ka pyrthei.

Kumta u nongialehkai une u nongialehkai u phai khmat sha ki bor ba dei peit ban iarap ia u namar ba haduh mynta mynne um ioh iaka jingkyrshan naki bor sorkar.