Ka burom ka phin ai ia nga kadei phin hikai hok iaki khynnah ong u ma Lahkmen iaka Nongtalang College

Syllad | The Rising MeghalayaAugust 17, 2022

Kum ka dak ka jingsngewnguh sngewburom ïaka jinglehbha jong u ma Lahkmen Rymbui ban pynrung Nongtalang College hapoh ka People’s College, ki nonghikai jong ka Nongtalang College kila pynkup burom ïa u ban pyrto iaka jinglehbha jong u haka sngi ba ar

Ha kane kajuh ka sngi la pynkup burom ïaki dkhot ka Governing Body jong u snem 2018-2022 bad ïaki 15 ngut ki samla pule kiba la wanrah burom ïaka kolej da ka jingwan haka kyrdan 1st Class haka exasamin BA bad kawei ka khynnah kaba ka wan shakhmat haka eksamin HSSLC.

Ïaka jingïalang pynkup burom la pynlong ha Hall ka kolej ba la pynïaid da u Spaiñlinmi Lapasam haka jingdonlang ki dkhot ka Governing Body bad ki samla pule.

U Myntri haka jingkren u pynpaw ba umdei uba sngew sarong ïaka jingpynkup burom hynrei kaba u sngew sarong eh kadei ba ka Governing Body, ki nonghikai, ki samla pule bad baroh kiba ïadonbynta bad ka kolej ki ai ka jingïatreilang.

 “Ka burom kaba phin ai ïa nga kadei phin hikai hok ïaki khynnah bad pynjanai ïa khnang ba kin long ki mawlynai haka jingim jong ki, kata kadei ka burom kaba nga sngewtynnad eh”, la ong u ma Lahkmen.

Ula kyntu ïaki nonghikai ban treihok ïaka kam khnang ba ki khun u duk u suk ki bym ïohlad ban bteng ïaki jingpule shajngai kin ïoh ban pyndep ïaki jingpule ha kane ka kolej bad ula kyntu ruh ïaki samla pule ban nangtrei shitom haki jingpule jong ki ban poi sha ka thong.

U Ma Rymbui ula ïathuh ba u don bynta bad ka kolej kumba 18 smen bad udei u President barim jong ka Governing body bad ha u snem 2018 ula resaiñ ïaka kam President ban ïashim haka kam saiñ hima sima.

Ula ïathuh ruh ïaka jingïaid lynti jong u mynshwa ryngkat kiwei pat ki dkhot naka bynta ka jingbit jingbiang jong ka kolej bad haka jingïaid lynti bunsien ki mad ïa kiba bun ki jingeh.

“Kum u briew ba ïohi ïa shibun ki jingeh  naduh ki por mynshwa haba ïadei bad ka kolej, mynta nga long uwei uba kmen tam ban ïohi ïaka jingkiew jong kane ka kolej bad kane kadei lyngba ka jingïatreilang kiba bun naduh ki nonghikai, ki nongtrei, ki nongpynïaid bad u paidbah”, la ong u Bah Rymbui.

Kiwei de kiba la ai jingkren ki kynthup ïa u Principal ka Nongtalang College u Dr. RR Kharkongor, u FSyiem Incharge Principal barim, u Hatmin Lyngdoh Giri President Governing Body, ka Dr Solony Bareh bad ka Kong Charity Ryngkhlem.

“Ka long shisha ka burom ïaki khynnah ki kmie ki kpa kiba lehse ki sngew ba kita ki snem kiba ki la pynlut ïa la ka bor ka buit bad pisa tyngka ha ka ban pynheh pynsan hynrei mynta ki la seisoh bad phi ki samla pule phi la pynphong ïaki kmie ki kpa da ka pansgniat ksiar”, la ong ka Dr Solony Bareh.

Baroh ki nongkren ki la kyrkhu kyrdoh ïaki samla pule ba U Blei Trai Kynrad un ai haki ka jingnang jingstad bad ban nangkiew haka jingim kaba man ka sngi bad ba kin jop ha kino kino jingïaid lynti jong ki bad la kyntu ban long ka nuska ïa kiwei pat ki khynnah kane ka kolej ba ka jingïatrei shitom lano lano ruh kam juh wanrah ïaka jingduh jingkyrmen.

Khyndiat shaphang ka Nongtalang College West Jaintia Hills District, la seng ïaka ha u snem 1988 da ka Dorbar shnong Nongtalang bad la registered ïaka hapoh ka Meghalaya Societies Registration Act, XII jong u snem 1983 bad la ithuh ruh ïaka da ka UGC hapoh ka Section 12 (B) & 2(f) jong ka UGC Act, 1956.

Nalor katta ka la ïoh ruh ïaka jingithuh na ka NAAC (National Assessment and Accreditation Council) ha u bnai Jylliew 2017. Mynta kane ka kolej ka ioh iaka kyrdan Grade B na ka NAAC.

Hadien ka jingïalang pynkup burom u Myntri ula leit jurip ïaka jingtei thymmai ïaka Nongtalang College kaba yn plie paidbah shen ha u Naiwieng mynta u snem.