Ka CAA ka dei ka mat kaba la khylliap ha Meghalaya; ong u President ka BJP

Syllad | The Rising MeghalayaMarch 15, 2024

U President ka Seng BJP ka Meghayala u Rikman G Momin ha ka 15 tarik mynta u bnai u la ong ba ka Citizenship Amendment Act (CAA) ka dei ka mat kaba la khylliap noh hapoh Meghalaya namar la pyllait ia ka jingtreikam jong kane ka ain ha ki jaka kiba hap hapoh ka Sixth Schedule.

Haba kren sha ki lad pathai khubor, u Momin u la pynpaw ka jingsngwnguh ia ka sorkar India bad khamtam ia u Myntri Rangbahduh Narendra Modi bad ia u Myntri kam Pohiing u Amit Shah halor ka jingburom ia ka jingsngew jong ki trai shnong riewlum da kaba pyllait ia ki jaka kiba hap hapoh ka Sixth Schedule na ka Citizenship Amendment Act of 2019. 

“Ha ka Act kaba nyngkong jong u snem 1955, ka jingpyllait ia ki jaka kiba hap hapoh ka Sixth Schedule kam shym la don satia.Ia kane la wanrah ha ka Act 2019 da ka sorkar BJP.Ka BJP ka sngewkhia na ka bynta ka bha ka miat jong ki riewlum bad kumta ka la wanrah ia ki kyndon kaba la pyllait noh na kane ka ain. Ka sorkar BJP ka ngeit ban shim ia ka jingmynjur jong baroh watla ia kane ka Act la mynjur naduh u snem 2019, bad ka sorkar ka la trei shitom ha kine ki saw snem hashwa ban pynmih ia ki Rule,” ong une u nongialam ka BJP.

“Kaba kum kane ka sienjam ba la shim da ka sorkar Pdeng ka pynthikna halor ka jingkut jingmut ban kyntiew ia ka jinglong jingman jong ki trai shnong riewlum lyngba ka jingpyntreikam ia ki skhim sorkar bapher bapher, ong u Momin da kaba bynrap ba ka Meghalaya mynta ka la lait na ka jingtreikam jong ka CAA bad kam don jingmut na ka bynta kito kiba iakhih pyrshah, hynrei kum ki nongshong shnong jong ka ri ngi dei ban iatreilang na ka bynta ka jingkiew shaphrang jong ka ri,” u la ong shuh shuh.

Shuh shuh u Momin u pyntip ruh ba dang shen haduh T.15,000 klur la mang na ka bynta ban pynheh ias ka surok Umroi -Silchar, kata na ka 2 lane sha ka 4 lane kaba pynpaw ia ka jingshimkhia jong ka sorkar u PM Modi na ka bynta ki paidbah bad ka roi ka par.