Ka campaign ba 10 sngi ban ialap iaka hok ki kynthei ha NEA University

Syllad | The Rising MeghalayaOctober 7, 2024

Ka ophis jong ka District Hub for Empowerment of Women (DHEW), West Jaintia Hills kaba hap hapoh ka ophis jong ka District Social Welfare Officer, WJH ha ka 4 tarik u Risaw ka la plie paidbah ia ka prokram jingpynshai paidbah ba 10 sngi kynthih halor ka jingrakhe ia ka ‘International Day of the Girl Child,’ ha ka jingialang ba la pynlong ha Northeast Adventist University, Khliehtyrshi, WJH.

Ha kane ka prokram ba la pyniaid da ka Kong S.Meliora Lamare, Gender Specialist, DHEW, WJH la ia don lang u Bah Wailadmi Shylla MLA Jowai bad Chairman ka MUDA kum u Kongsan.

Haba plie ia kane ka prokram u MLA ka thain u la pynpaw ia ka jingkongsan ban bteng ia ki jingpyrshang ban kyntiew ia ka jingiaryngkat hapdeng ki kynthei bad ki shynrang ha ka pule puthi, ka koit ka khiah bad ki lad long nongialam na ka bynta ki khynnah kynthei.

U la ban jur halor ka bynta kaba kongsan jong ki khynnah kynthei bad ki longkmie ha ka imlang sahlang kaba ai jait sha ka kynthei halor ki jingeh kiba ki iakynduh, kata kum ka jingkhlad jong ki longkmie ha ka por kha khunlung kiba dei ki jingjia kiba dang kynrei bha namar bun ki longkmie ki dang bteng ban bud ia ki rukom pynkha khun da ka juk barim.

U la kdew ruh halor ka jingkiew jong ki kam thombor pyrshah ia ki kynthei khynnah kum ki jingjia shah leh beijot, ka jingshah pyniap bad kiwei da kaba pynshong nongrim halor ka jingpyndonkam bakla ia ki kor jingstad bad ki social media.

Nalor kata u la kdew ruh halor ka jingkongsan ha ka jingiashim bynta jong ki kynthei khamtam ki khynnah kynthei ha ki jingialehkai sport bad halor kiwei pat ki bynta ha ka kyrdan jong ka ri bad ka pyrthei da kaba weng ia baroh ki jingsngewthuh bakla.

U la pynpaw ba na ka liang ka sorkar ruh ka pynshlur ia ki kynthei ban iashim bynta ha ka kam sain hima da kaba kdew ruh halor ka bhah katkum ka Women Reservation Bill kaba thymmai kaba la mang kyrpang 33% ki seat na ka bynta ki kynthei hapoh ka Lok Sabha bad ki iingdorbar thaw ain ki Jylla.

Kumjuh une u nongmihkhmat ka thain u pynshlur ruh ia ki samla kynthei ba kin mih shakhmat ban iashim bynta ha ki kam sain pyrthei khnang ban wanrah ia ka jingkylla ha ka roi ka par. U la kyntu ruh ia baroh ki kynthei ba kin ia don bynta ha ki kam bapher bapher, da kaba pynpaw ia ka bynta kaba kongsan ka jong ki  ha kaba kyntiew ia ka hok ha ka imlang sahlang, bad ki don ruh ia ka jinglah ban long ki nongialam kiba tbit ha ki bynta bapher bapher jong ka imlang sahlang, kum ha ka sain pyrthei, ki kam khaii pateng, ka pule pule bad ka imlang sahlang.

U Dr. H. Niang, Block Development Officer, Thadlaskein Block, u la kren halor ka jingdonkam ban pynkupbor ia ki kynthei da kaba shim khia ia ka jingkoit jingkhia ha ka met bad ka bor pyrkhat pyrdain jong ki khynnah kynthei bad ki longkmie. Ula ban jur ruh ia ka bynta kaba kongsan kaba ka khynnah kynthei ne ka kynthei ka don ha ka imlang sahlang. U la ong ba ki khynnah kynthei bad ki kynthei ki long ki atiar ban saindur ia ka lawei jong ka imlang ka sahlang da kaba ioh ia ka jingnang jingstad kaba bha bad ban bteng ia ki jingandnud jong ki ha ki kam ki jam.

Ka Kong I Kharpran Officer Incharge Women Police Station Jowai, kaba la iashim bynta kum ka Resource Person ha ka prokram ka la iakren halor ka phang kaba iadei bad ki kam pyntriem pyrshah ia ki kynthei khynnah kum ki kam pyniap, ki jingshah thombor ha ki iing ki sem, ka jingshah lehbein, jingshah leh beijot, shah rahbor, shah khaii, Cyber Crime bad ki ain kiba iadei na ka bynta ka jingshngain jong ki kynthei kum ka ka Domestic Violence Act, Sexual Harassment of. Women at Workplace (Prevention, Prohibition and Redressal) Act, 2013, The Information Technology Act, POCSO ACT, Special Provision for Women under the Bharatiya Nyaya Sanhita Act bad bad ki jingai jingmut na ka bynta ka jingshngain ha ka online.    

Kiwei pat kiba la aijingkren ha kane ka prokram ki kynthup ruh ia ka Kong Y Najiar, District Social Welfare Officer, Jowai, u Dr. Paul Bhaggien, Vice Chancellor Northeast Adventist University, Khliehtyrshi bad kiwei kiwei ha ka jingiadon lang ki nongshong shnong ka thain kynthup ia ki longkmie, ki samla bad ki khynnah skul bad kiwei.