Ka committee thymmai ka dei buh por ban iakren iaka Reservation Policy: JSU

Syllad | The Rising MeghalayaMay 31, 2023

Ka Jaintia Students’ Union (JSU) kala leit ban jngoh ia u Bah Ardent Miller Basaiawmoit ban ai mynsiem bad kitbok kitrwiang halor ka jingshah thngan jong u ban pynkylla thymmai iaka Meghalaya State Reservation Policy 1972.

U general secretary ka JSU u Treiborlang R Suchen ula ong ba ki ai ka jingkyrshan kaba pura iaka jingiakhih jong u bah Ardent nongialam ka Voice of the People Party (VPP), uba la shim iaka sienjam ban shah thngan naka bynta ka jingeh ka jaidbynriew baroh kawei.

Ula ong ba ka por kala ih bha ba dei ban pynkylla noh mardor ia kane ka reservation policy kaba la rim bha.

Haba kren halor ka Roster ne ka bhah ban buh beit ryntih iaka jingthungkam, ula ong ba ka clause 1.2 ka kren shai ba ki kam kiba ym lah ban pyndap ha u snem ba lait ka kam yn ym lah ban ai bhah biang hadien u snem u ba ar bad naka jingshna kyrkieh ka sorkar ia ka roster lyngba ka Office Memorandum ha u snem ba la dep bad ha kane ka Roster ka don ka clause D ka ban pynduh nong ar shah iaki Khasi Jaintia.

Ula ong ruh ba ka jingthmu ba ban pyntreikam iaka roster na naduh snem 1972 bad kane ka long ban ai lad shuwa ia u Garo ban pyndap ia baroh ki post kiba lait ha ki ophis sorkar bad kane kan pynduh nong arshah iaki Khasi-Jaintia namar haduh ban da dep pyndap ia kine ki post kiba lait da ki Garo bad kane kan shim por haduh 30 snem iaki Khasi Jaintia ban ioh rung kam biang ha ki ophis sorkar.

Kumta ka JSU ka dawa ban pynbeit mardor ia kane ka bhah thung kam thungjam namar kam iahap shuh bad kane ka juk bad kala theh shilliang tang sha kawei ka jaidbynriew. Ula ong ruh ba ka committee kaba thymmai halor ka reservation policy kadei ban buh da ka por ban iakren ban lait na kano kano ka jingshah pynthame ne shah pynbiej haka sorkar.