Ka Congress ha ICU, ym don jingmut ban kyrshan ia ka UDP, VPP ha ka MP ilekshon: Dhar

Syllad | The Rising MeghalayaMarch 15, 2024

U National General Secretary ka National People’s Party (NPP) uba dei ruh u Symbud Myntri Rangbah ka Jylla u Bah Sniawbhalang Dhar u la ong ba ka liang pyrshah Congress ka la don lypa mynta hapoh intensive care unit (ICU) bad kan ym don jingmut ban jied biang ia u kyrtong jong ka uba dei ruh u MP ba mynta u Bah Vincent H Pala napoh Shillong parliamentary seat.

Ha ka jingsngew jong u, u la ong ba kan ym don jingmut ruh ia ki paidbah ba kin aijingkyrshan ne vote ia ka liang pyrshah Voice of People Party (VPP) bad ia ka United Democratic Party (UDP) namar kine ki kut noh tang hapoh Byrnihat bad kim poi shano shano ruh.

Haba kren ha ka jingialang kaba la long ha ka 14 tarik mynta u bnai ha Byrnihat, Ri Bhoi District ban pan jingkyrshan na ka bynta ka kyrtong ka NPP napoh Shillong kaba dei ruh ka Myntri sorkar jylla ka Kong Ampareen Lyngdoh, u Dhar u la ong ba ki don kumba 4-5 ngut ki kyrtong ki ban ia aireng ha kane ka Lok Sabha ilekshon, hynrei u kyrtong ka UDP un ym poi shano shano ruh bad u kyrtong ka VPP ruh kumba phi tip baroh kin shu kut tang ha Nongpoh (Byrnihat).

Nalor kata u la ong ruh ba ki nongthep vote khamtam ki paid Garo bad ki bym dei ki trai Jylla (Non tribal) kim don kano kano ka jingiadei bad kine ki artylli ki party.

Da kaba ong ba ka Congress ka dei ka party kaba la ngam jyllop, u Dhar u la ong, “ Ka Congress ka la don lypa ha ICU bad ngim tip kaei ka ban jia ia ka. Kane ka party ba la rim mynta ka don tang 5 ngut ki MLA ha ka Jylla.Kane ka party ka ba la synshar ia ka Ri ryngkat ka jingbun paid kaba kot 543 ngut mynta ka la don satang 40-50 ngut, bad ha kane ka ilekshon ka ban wan Ngam tharai ba kin kynjoh wat ha ka 40 tylli ki seat ruh.Kumta balei ngin kwah ban phah ia u MP ka Congress.”

“Lada ngi phah ia ka Congress ka la iakhun ia ka thma kaba la shah rem lypa.Kumta Nga kyntu ia ki paidbah ba ka lad mynta ka long ba phin kyrshan ia ka kyrtong ka NPP ka Kong Ampareen Lyngdoh.U la ong ruh ba ki paidbah kin bishar ia ki jingtreikam jong u Pala ha kine ki 15 tylli ki snem kiba la leit noh.”

Ha kane ka jingialang ba la pyniaid da u MLA ka Jirang u Bah Sosthenes Sohtun la ia don lang ruh ki nongialam bad ki nongtrei jong ka party.