Ka Congress ka la jop lypa namar ka bye-election ha Gambegre ka sakhi ia ka jingwan pyndem u CM bad ki Myntri: Saleng

Syllad | The Rising MeghalayaNovember 5, 2024

U nongialam ka Congress uba dei ruh u MP ka Tura u Saleng A Sangma ha ka 4 tarik u Naiwieng u la ong ba ka party jong u ka la dei lypa ka nongjop namar ka elekshon shiteng samoi ha Gambegre ka la lah ban tan naduh ia u Myntri Rangbah haduh ki Myntri jong u bad lem ki nongmihkhmat ba kin wan dem bad khroh ia ki paidbah ka constituency ban ioh vote da kaba pynbiej halor kiba bun ki jingeh kiba ki iakynduh.

Haba kren sha ki lad pathai khubor, u Saleng u la ong, “Ngam pat ju iohi ba u Myntri Rangbah un wan ialap sha ki man la ki jingkhang iingbriew ha kino kino ki constituency bad wat ha la ka jong ka constituency, hynrei mynta ka kynti u la hiar sha ka jaka kaba um dei ban leit. Mynta tang namar ka kurim jong u, u la hap ban leit sha man la ki thliew iing, ki dong bad ki shnong. Nga sngewkmen ba kane ka elekshon ka la pynhiar ia ki Myntri, kata ban iohi da la ki jong ki khmat ia ki jingshisha kiba ki paidbah ki iakynduh jingeh. Kane ka elekshon shiteng samoi ha Gembegre ka la aijinghikai shisha ia ki.”

Une u MP u la ong ruh, “La ngi jop ne rem, Nga tharai Nga la jop ia ka thma…ka Congress ka la dep jop ia ka elekshon. Phi tip balei? Namar baroh ki Myntri, u Lamphang bad baroh ki MLA ki la leit sha man la ki kyndong kynshrot jong ka constituency barim jong nga, ka Gembegre katba mynshwa kim ju mutdur wat tang ban leit iuhkjat lane ba kin kwah hi ruh, hynrei mynta kane ka elekshon ha Gambegre ka la tan lut ia ki baroh. Nangta phi tip ki la wan ban khroh vote bad peit iaka jingdonkam u paidbah.”

“Hato phi la ju iohi ia u Lamphang, u Myntri Rangbah, u Symbud Myntri Rangbah, baroh ki leit sha kawei pa kawei ka iing? Baroh ki MLA bad myntri ki hiar sha kawei ka constituency bad iohi ia ki jingeh bad pyrshang ban weng ia ki jingeh jong ki paidbah. Peit ia ka bor jong ki paidbah”, u la bynrap.

Haba kylli, u Saleng u la ong, “Mano ban long uba sngewthuh bakla ban ngeit ia kaba kum kane ka jingleh? Namar ba ki iatreilang bad ka BJP mynta, hangne ​​hi ha ka jylla bad ki iatreilang da kaba don ha ka sorkar. Ki pyrkhat ba ki pyrshang ban pynbieit iano? Iathuh ia nga? Hato ngi dei kiba mutlop?”

U la kynnoh ruh da kaba ong “Ym tang ka pisa hynrei ki la dep pyndonkam lut ia ki bor jong sorkar ha katei ka jaka ia kaba nga itynnad bha namar mynta ki briew ki lah ban iohi bad ki briew ki lah ban sngew haba ki khlain, ki lah ban pyndem wat ïa u Myntri Rangbah bad ia u Lamphang.”

Haba kylli, u Saleng u la ong, “Ha ki katto katne ki jaka, nga la panmap ruh lada ngam lah ban poi sha ki katto katne ki jaka kumta ngam ju kyrpad vote. Nga kyrpad ia ki ban peit ia ki report card jong kawei pa kawei ka snem shaphang kaei kaba nga la leh bad kaei kaba ngam shym la leh. Lada phim don ia ka kaiphod jong ka jingkiew, wat leit phai biang. Nga la ai ia ki ia ka kaiphod jong ka jingiaid shaphrang”, u la ong.

“Haba ki (NPP) ki kren shaphang ka roi ka par, ki pynjah burom ia la u jong u kpa. U (L) PA Sangma uba la long u Myntri ka sorkar pdeng, u la long ruh u Lamphang (Lok Sabha) bad ha kata ka por wat ka jylla ruh ka don hapoh jong u, ki kynum jong u ki dei ki Myntri ha kata ka por. Lada ka Garo Hills ka sahdien ki dei ban kynnoh ia la ki jong ki briew. 47 snem kam dei ka kamkai. Ym pat shym la kha satia ia nga ha kitei ki por,” bynrap u MP.

Halor ka jingkynnoh jong ka NPP ba ka lyer jong u kan ym ktah ia ka elekshon shiteng samoi, u Saleng u la ong, “Lada ka lyer jong nga kan ym ktah, mano ba phi iohi ha madan man ka sngi, na jingkhang sha jingkhang? Hato kin sa leit noh? Kino kino ki briew kiba don ka jingmut jingpyrkhat kin ym ngeit ia ki kam shukor. Ki la iohi baroh ki la iohi balei u Myntri Rangbah u don hangta 24 kynta? Balei u Lamphang u don hangta? Balei baroh ki myntri ki ialap elekshon ha man la ki jaka thep vote bad ki dong ki shnong? Ka NPP ka la sngew ba ka shah byrngem ha ki paidbah ym ha ka Congress namar lada ki briew kim shym la jied ia nga na ka bynta ka Congress ha kane ka elekshon shiteng samoi, kin ym phah wan pyndem ia ki haduh katne.”

Sngewkhia jur u MP ka Tura ba sahteng ki skhim MPLAD scheme mynta lah palat 22 snem ha ka Jylla