Ka Congress kaba khang bam doh masi bad thmu wanrah CAB naduh ka por ka Indira bad u Manmohan: Dr. Jemino Mawthoh

Syllad | The Rising MeghalayaMarch 26, 2019

JOWAI: U Kyrtong monlang jong ka Meghalaya Democratic Alliance (MDA) u Dr. Jemino Mawthoh ula ong ba dei ka Congress party kaba sdang ban khang bam doh masi bad ka symbol jong ka Congress mynshwa ka dei ka “Masi” bad dei ka sorkar Congress kaba sdang ban iasaid ban pynkylla ia ka Citizenship Amendment Bill (CAB).

Ka dei ha ka por ka jinglong Prime Minister ka Indira Gandhi ba ka la hukum ia ka ki myntri rangbah jong ki 14 jylla ban khang bam doh masi bad dei ha ka por u Manmohan Singh kum u Prime Minister ba la iakren ban wanrah ia ki amendment ia ka CAB, ong u Dr Jemino haba kren haka jingïalap elekshon ba nyngkong eh jong u ha rilum Jaiñtia ha Iongpiah, Jowai mynta ka janmiet.

Ula ther tyngeh ia u kyrtong jong ka Congress u Ma Vincent H Pala uba ong ba ha ka elekshon MP dei ban jied tang ia ki National Party namar u MP na ki party riewlum lada un shah jied un  long kumban jngi ha ka duriaw baheh. U MLA barim jong ka Nongthymmai u la pynkynmaw ia ki paidbah ba ki ladep phah ia u Prof G G Swell kum u MP san sien bad u la iakhun ia ka elekshon na ka party rilum bad u Prof Swell u la leh ki kam kiba radbah na ka bynta ka jaidbynriew.

Ula ong ruh ba u ma Pala u dei uba sniewbok tam namar ba ym lah ban pyllait ïaka jingkhang tih dewiong haka jylla bad kum u MP ka Jylla ha kine ar samoi ym shym la lah ban pynioh kam ïaki samla pule kiba la nang la stad bad kam don ruh ka jingpyrshang ban plie lad plie lynti iaki ba kin pynpaw ïaka sap ka phong jong ki.

U Dr. Jemino u la pynshai paidbah ba lada u ieng na ka symbol monlang ka pyni bad u dei kyrtong shimet bad kan nym don kano kano ka jingteh jingkhum ia u bad lada u jop u la ban rung sha kano kano ka party. U la ong shuh shuh ba u la ieng na ka symbol UDP hadien ka jingiamynjur lang jong ki nongialam jong ki party hapoh ka MDA khnang ba kan don ka jingteh ka jingkhum ia u hadien ba u la jop ia ka eleshon MP.

“Lada nga poi sha ka thong nga peit ïa ki mat kiba ktah iaka jylla, kata ban pynbeit ia ka jingiakajia khappud, ka jingpynrung ia ka ktien Khasi ha ka Eighth Schedule, ka roi ka par bad ban iakhun ban pyllait ia ka jingkhang tih dewiong ha ka Jylla nalor bad plie lad lynti ïaki samla ba don sap ban ieng hala ki jong ki kjat”, la ong u Dr. Jemino Mawthoh.

Halor ka jingpyntreikam jong ka MP Skim lada u poi sha ka thong, u Dr. Jemino u la ong ba namar u long u kyrtong monlang jong ka sorkar MDA te kumta yn thaw ia ka committee kaba kyrpang haba yn don ki nongialam na ki seng sain hima sima kiba don ha MDA ban khmih ia ka jingpyntreikam jong ka MP Skim khnang ba baroh ki constituency ban pynpoi hok sha u paidbah.

Haba ai jingkyrshan kaba pura ia u Kyrtong jong ka sorkar MDA, u Myntri ka tnat Transport u Ma Sniawbhalang Dhar ula kyrpad ia ki paidbah ba kin ai ia ka vote ka jong ki ia u Dr.Jemino bad ka jinpynieng ia u Dr. Jemino na ka symbol UDP bad na Tura ban iakhun da ka NPP kaba ka kyrtong ka dei ak Agatha Sangma kadei kaba la pynbeit da ka MDA.

Kiwei kiwei kiba la ai jingkren ki long u Chief Executive Member jong ka JHADC u Ma Thombor Shiwat, u Chairman ka JHADC u Ma Lakhon Biam, ki MDC kiba kynthup ia u Ma Saron Pasweth, u Ma Phasmon Dkhar, u Ma  Brightstar Chyrmang haka jingiadonlang u Bah Moonlight Pariat u President ka UDP West Jaintia Hills bad u Ma O Lamin u President jong ka NPP West Jaintia Hills.