Ka Congress kam larkam shuh, ka VPP ka kut tang ha kawei ka district: Paul Lyngdoh

Syllad | The Rising MeghalayaMarch 28, 2024

U nongialam ka United Democratic Party (UDP) uba dei ruh u Myntri sorkar u Bah Paul Lyngdoh u la ong ba ka kynhun Regional Democratic Alliance (RDA) ka kham don ia ka kabu ban ioh ia ka jingjop napoh Shillong parliamentary seat ha kane ka Lok Sabha ilekshon ka ban wan namar ka Congress ka dei ka party ka bym larkam shuh bad ka seng Voice of the People Party (VPP) ka dei ka party kaba kut tang ha kawei ka district.

Haba kren sha ki lad pathai khubor haka 27 tarik Lber, u Bah Paul u la ong ba ka Shillong ka ju long ka ktem jong ka seng Congress, hynrei ka la wan ka jingkylla kaba khraw ha ka sain hima sima hapoh ka ri India, bad kumta ruh kane ka la iarap shibun ia ka UDP bad ka kynhun synrop kum ka RDA.

U Bah Paul u la ong ba kane ka la wan long namar ha kawei ka liang ka don ka jingbym sngewtynnad ia ka BJP. Ka jingshisha hi ba kam shym la pynieng kyrtong ha Meghalaya ka pyni ba ki tip ba kam don jingmut ia ki ban pynieng kyrtong. Kumta mynta ka don ka jingbym sngewtynnad ia ka BJP katba ka Congress ka la kylla long ka party ka bym larkam shuh, kumta shano ki paidbah kin vote?

Nalor kata u la ong ruh ba ka VPP ka dei ka seng kaba dang shu mih thymmai ha ka kam sain hima bad kam don jaka satia hangno hangno ruh lait noh tang hapoh ka thain East Khasi Hills.

“Kane ka party (VPP) ka don tang ha kawei napdeng ki khatar tylli ki district jong ka Jylla, kumta kan ym lah satia ban khot ia lade ka seng Riewlum, bad kam dei hi ruh ka party ka Jylla hynrei ka dei ka party tang jong kawei ka district,” ong u Paul Lyngdoh.

U la bynrap ruh da kaba ong, “Phi sngewthuh ia kane ka jingpynpaw, ngi iakhun ha ka rynsan bad ka jinglong jingman ha kaba ka national party kaba lamkhmat kam shym la iakhun ha ka ilekshon, ka NPP ka la jied ban iatreilang bad kane ka party, ka Meghalaya ka la ju vote pyrshah ia ka BJP, ka Congress ka dei ka bym larkam shuh bad ka VPP ka don tnag ha East Khasi Hills, kumta mano ba don lad bha ban jop, ka shnong ha phi ba phin ia khein jingkhein?”

Da kaba pynpaw ba ka UDP ka dei ka party kaba lamkhmat hapoh Khasi bad Jaintia u Bah Paul u la ong, “Ka jingshisha ka long ba ngi don 12 ngut ki MLA bad ngi la jop kham bun ki constituency ha Khasi bad Jaintia. Ha kawei ka khep ka UDP ka la jop 7 na ka 7 tylli ki constituency ha Ri lum Jaintia. Mynta lada phi nujor ia kane bad ka NPP, ka NPP ka la jop tang khyndiat eh ki seat bad nalor kata wat ha ki ADC dei ka UDP kaba la kham jop bun hynrei namar ka jingbym don jong ka Tenth Schedule kumta ruh ka la mih ka jingiaphet sha ka seng NPP kaba ialam mynta ia ka EC hapoh KHADC.”