Ka Congress kan ai bhah kyrpang 33 percent ka kam sorkar ïaki kynthei: HM Shangpliang

Syllad | The Rising MeghalayaApril 9, 2019

JOWAI:  Ka Congress lada ka wan haka bor synshar haka MP Lok Sabha kan ai bhah kyrpang haduh 33 percent ka kam sorkar iaki kynthei haka Ri, la ong u Bah HM Shangpliang u nongaiktien ka Congress haka jingialang ban pan jingkyrshan ia u kyrtong ka Congress u ma Vincent H Pala ha madan ialehkai ka Dong Tympang haka sngi Nyngkong.

U Bah HM Shangpliang ula ong ba tang ka party Congress kaba pyrkhat ïa u kup shilliang sem shilliang bad lada ka wan biang haka bor kan mang pisa kyrpang ia u paid nongrep ka ri, uba kat nang rep nang syrdep ha kane ka sorkar kaba mynta kaba leh bymsuidniew ïaki nongrep.

Ka Congress kala mang ban iarap pisa sha ki longïing ba duk tam T.72 hajar shi snem kawei ka iing lyngba ka Minimum Income Guarantee Scheme (MIGS) bad ruh yn pynbun sngi shuh shuh ïaka bylla sngi naka 100 sngi sha ka 150 sngi lyngba ka skim MGNREGS ban kyntiew iaka ioh ka kot ki nongshong shnong ha ki thain nongkyndong.

U Nongaiktien ka Congress ula ther ïa u Narendra Modi Myntri Rangbah Duh ka Ri, uba heh tang ka kular bad ka thok ka shukor ïa u paidbah bad ula ong ba tang ka Congress kaba nud ban ïakhun bad kren pyrshah iaka BJP bad baroh ki jingthmu jong kila pulom kynthup ïaka CAB kaba ka sorkar BJP kaba kwah ban pyntreikam ïaka tang na ka bynta ban ban pynrung ïa ki Hindu na Afghanistan, Bangladesh bad Pakistan sha Ri India lyngba ka ain CAB bad kane kan buh ia ka jingma kaba khraw ia ka jaidbynriew rit paid.

Kiwei kiwei kiba kren haka jingialang ki kynthup ïaka Dr. Ampareen Lyngdoh, U Ma MB Rymbai, u Ma Shitlang Pale, Pastor PBM Basaiawmoit haka jingialang kaba pyniaid u Andrew Shullai, MDC JHADC.