Ka Congress kan wanphai biang ha ka bor ha u 2028; ong u MP ka Tura

Syllad | The Rising MeghalayaJuly 7, 2024

U MP ka seng Congress na Tura Saleng u Saleng A Sangma ha ka 6 tarik Naitung u la pynthikna ban shim khia ban iakren bad ka Sorkar Pdeng na ka bynta ban pyntreikam ia ka Inner line Permit (ILP) bad ban pynrung ia ka ktien Khasi bad Garo ha ka khyrnit ba phra jong ka riti synshar jong ka ri India.

“Ngan buddien ia baroh ki bynta kiba u Bah Vincent H Pala u la dep ban shimti. Kum ka nuksa, u la dep ban kren ha kaba iadei bad ka ILP bad ban pynrung ia ka ktien Khasi bad Garo ha ka khyrnit ba phra hapoh ka iingdorbar,” ong u Saleng hadien ba u la shah pynkup burom ha ka jingïalang kaba la pynlong da ka Meghalaya Pradesh Congress Committee (MPCC).

Haba pynpaw halor ka jingdonkam ban khie im biang ia ka Seng Congress ha Meghalaya, une u MP ka Tura u la ong, “Ngin ym ailad satia tang namar ba ngi la rem hangne ha Ri Lum Khasi. Nalor kata u la iathuh lypa ruh ba ka Congress kan sa ioh biang ia ka bor synshar ha u 2028.

U la ong ruh, “Kane ka dei ka sienjam kaba nyngkong ba ngin pynphai dien bad pynthikna ba ha u snem 2028 ka Congress kan sa synshar ia ka sorkar bad nga thikna ar spah percent. Nga pynthikna ia ka kynhun jong ngi na ka Meghalaya Congress, ngin sa synshar bad na ka Congress bad un sa don u CM ym tang ha Meghalaya wat ha ka national level kumjuh, phin iohi ba ka Congress kan sa wan biang da ka jingbun paid,” u la ong.

Nalor kata u la bynrap da kaba ong, “Balei ngi la shah rem ha kane ka elekshon, ngi hap ban peit biang bad pyrkhat biang bad ban peit biang ia kiei kiei ki bynta kiba ngi don jingduna.”

Shuh shuh haba pynpaw ba ka jingshisha ka la iarap ia u ban jop ia ka elekshon parliamentary ha Tura, u Sangma u la ong, “Ka jingjop jong nga ha Garo Hills ka dei namar ba ngi la pyrshang ban spel ia ka jingshisha bad kata ka jia hapoh ka jylla bad ka ri. Ngim shym la pyrshang ban thok ne ban ai ki jingkular lamler ha ki jingialap ki jong ngi hynrei ngi la shu pyrshang ban pyni sha ki briew kumno ngi shah thok, kata ha ka liang ka pule puthi, ka koit ka khiah, shaphang ka imlang sahlang, shaphang ki dawai dashin, shaphang ka jingleh thok ia ka khajna bad ka jingshalan tuh shabar ka jylla – kumta kine ki dei ki bynta kiba ngi pyrshang ban pyni sha ki briew bad ban ai ia ki ia ka jingshisha.