Ka C&RD Block kaba 48 yn plie noh ha East Jaintia Hills

Syllad | The Rising MeghalayaNovember 8, 2022

Ka jingangnud kaba la slem bha jong u paid nongshong shnong ka thain Narpuh kan urlong noh hadien ba u Myntri Rangbah ka Jylla Conrad K Sangma ula pynbna paidbah ban plie noh iaka C&RD Block kaba 48 haka shnong Lumshnong.

Ia kane la iathuh da ki nongialam ka Narpuh Border Area Joint Action Committee (NBA – JAC) hadien ka jingwan iakynduh ia u Myntri Rangbah ka Jylla haka sngi ba Ar.

U Myntri Rangbah ula pynbna iaka Lumshnong C&RD yn plie paidbah haka 26 tarik u Naiwieng. Ula ong ba ka Sorkar kan thung iaki nongtrei na ka bynta ban pyntreikam mardor ia ka block office ha ka jaka ban buh ia u maw nongrim la ong ka Narpuh Border Area Joint Action Committee (NBA – JAC) 

U Chairman ka NBA JAC ma Emlangky Lamare uba long ruh u MDC JHADC, ula ong ba ka JAC kala khublei iaka sorkar MDA kaba la pynurlong ia kane ka jingangnud u paidbah ka Narpuh kaba kila dawa iaka hok naduh u snem 2018 kaba ha kane ka kynti kala long kaba jop.

 U secretary JAC Daiapherbha Lamare ula iathuh ba kalong ka khubor kaba bha ia u paidbnah ka Elaka bad kila rai ruh ban ai sngewbha iaka jaka ban shnong iaka ophis jong ka block

Ula ong shuh shuh ba kane ka thain kumba ka long ka dei kaba sahdien tam wat hadien ba kane ka thain ka pynmih iaka khajna kaba bun sha ka sorkar.

Kane ka thain ka don palat 38-40 ki shnong kiba hap hapoh blook kaba thymmai, ka Lumshnong C&RD block.

“Kane ka block ophis kaba thymmai kan iarap iaki paidbah haka leit ka wan rwiang kaba jngai haduh 120 KM Malidor sha Wapung C&RD block na ka bynta ki kam barit eh,” la ong u Daiapherbha.

Kumban shu pynkynmaw ba ka NBA JAC kala pyrshah jur iaka jingpynkynriah iaka block na Lumshnong sha Wapung, kaba la poi ruh shaduh ka iingbishar Meghalaya High Court.

U Secretary ka JAC ula kynnoh ba kane ka dei ka jingleh politik u Myntri Rangbah barim u Mukul Sangm ban pynbiej iaki paidbah. Ula kynnoh ba kane ka rai kyntiew kyrdan iaka Lumshnong ka dei tang ha I kot lynkdop A4 size paper.

Ki paidbah ka thain Napruh ki kwah iaka roi ka par bad kila shaniah iaka sorkar u Mukul, bad hadien kila buddien bad la lap pynban ba ka dei tang ka jingpynbiej politik

U Daiapherbha ula put turoi ruh iaka sorkar MDA ba kala pynthikna ba ka jingbuh iaka C&RD Block ha Lumshnong ka dei ka jingthmu ban pyniajan iaka jingshakri sha u paidbah.