Ka dei ka jingleh jong ngi hi ba shah khang tih dewiong: Kyrmen Shylla

Syllad | The Rising MeghalayaOctober 12, 2020

U Myntri jong ka sorkar MDA uba long ruh u MLA ka Khliehriat, u ma Kyrmen Shylla ula kubur bad ong “Ka dei ka jingleh jong ngi hi ba shah khang ka jingtih dewiong ha Jylla.”

“Ngi khlem ai jingiada bad sumar iaka sawdong sawkun ka mariang, kaba la wanrah ka jingiap bad jaboh ki um ki wah ba ka National Green Tribunal (NGT) kala khang iaka jingtih dewiong haka jylla baroh kawei,” la ong u ma Kyrmen Shylla haka jingialang plie paidbah iaka iingdorbar jong ka Datsimpein, Ladrymbai haka sngi Saitjain.

Ïa kane ka iing dorbar jong ka Datsimpein, Ladrymbai la tei haka jinglut kaba 6 lak tam kaba kynthup naka MP Scheme (MP-LADS) 2018-2019 bad naka MLA skim Special Rural Works Programme (SRWP) 2019-2020 T.2 lak 50 hajar.

Ha kane ka jingplie paidbah ia kane ka iing dorbar nalor u ma Kyrmen Shylla la iadonlang u MDC ka thain u ma Finelyness Bareh, Dolloi ka Elaka Jowai u Puramon Kynjing, u Waheh Shnong Datsimpeiñ u T. Suchiang, u Fr. Simeon Sungoh bad kiwei kiwei.

U Ma Kyrmen ula ong shuh shuh ba shuwa ka jingkhang ka tih dewiong kane ka district kadei kaba pahuh haka kamai ka kajiih bad u paidbah nongshong shnong haba don kino ki kam na ka bynta ki kam pynroi ha shnong ka thaw ban shna iaki lynti shnong bad ki iinghall ki shnong ki phai khmat sha ki malik dewiong, hynrei mynta wat ka kam ruh ki paidbah kila phai sha ka sorkar bad ki lad pynroi kum ki hall bad kiwei kiwei ruh ki shnong kila khmih lynti naka sorkar.

Shuh shuh u Ma Kyrmen ula ong “Nga kyrmen skhem ba haka jingïalam ba stad jong u Myntri Rangbah ka sorkar Jylla u Conrad K Sangma u paidbah un sa ioh biang ban tih ia u dewiong kumba ju long ryngkat ki lad ïada ïaka mariang.”