Ka Dkhiah West bad ka Musniang ki lahduh haka 3rd bad 2nd Div ka EJHDFA

Syllad | The Rising MeghalayaOctober 16, 2024

Ka Dkhiah West SC bad ka Musniang SC ki la long ki lahduh haka 3rd bad 2nd Division Football Tournament kaba pyniaid da ka East Jaintia Hills District Football Association (EJHDFA). Kane kala wan hadien kila jop haka jingiakhun final kaba long haka 16 tarik u Risaw ha ha madan Artificial Turf Diengshynrum, Khliehriat.

Ka Dkhiah West kala jop pyrshah iaka Lumshnong YWSC da 1-0 haka kyrdan 3rd Division Football Tournament. Ia kane ka shikol la thep da u Nevermind Kya (34).

Kaa Musniang SC kala pynliem da 3-1 iaka Sutnga Mission SSCC haka 2nd Division. Iaki lai kol ka Musniang SC la thep da u Mardi Rymbai (23, 69) bad Fourki Rymbai (74). Shikol na kaliang ka Sutnga Mission SSCC la thep da u Interest Pajuh (32).

Haba kut ka jingialehkai la sam iaka khusnam iaki khusnam shimet shaki rangialehkai.

Haka kyrdan 3rd Division iaka nam ‘Player of the Match’ la ioh da u Justin Niang na Lumshnong YWSC katba haka 2nd Division la ioh da Mardi Rymbai na Musniang SC.

Iaka nam ‘Player of the Tournament’ haka kyrdan 3rd Division la ioh da u Coming Dkhar na Tuberkmai shnong katba haka kyrdan 2nd Division la ioh da u Heimonmi Dkhar na Musniang SC.

Iaka nam ‘Goalkeeper of the Tournament’ haka kyrdan 3rd Division la ioh da u Wadphang Phawa na Dkhiah West SC katba haka kyrdan 2nd Division la ioh da u Commander Bareh na Lad Rymbai Dongwah SC.

Iaka nam ‘Best team’ haka kyrdan 3rd Division la ioh da ka Khliehriat East YWSC katba haka 2nd Division la ioh da ka Musniang SC.

Ka khusnam ‘Top scorer’ haka kyrdan 3rd Division la ioh da u Gradely Mylliem na Ratacherra CSC uba la ioh ban thep10 kol ha kane ka aiom ialehkai, katba haka kyrdan 2nd Division la ioh da u Obadaia Bareh uba la thep 6 kol ha kane ka aiom ialehkai.

Iaki khusnam shaki kynhun lahduh bad kynhun ba wan ba ar la sam da u kongsan Ma Rudion Roland Kyndait haka jingdonlang u Ma Daiapher Lamare, ki Waheh Shnong jong ki shnong bapher ka district, ki riew rangbah, ki nongialam bad dkhot ka EJHDFA.