Ka don ka jingiasngewthuh jingmut barieh hapdeng ka TMC bad ka BJP, ong u nongialam Congress

Syllad | The Rising MeghalayaMarch 13, 2024

U nongialam ka Congress Legislature Party (CLP) u Bah Ronnie V Lyngdoh ha ka 13 tarik Lber, u la kynnoh bad ka seng All India Trinamool Congress (TMC) bad ka Bharatiya Janata Party (BJP) ki don ia ka jingiadei bad ka jingiasngewthuh jingmut kaba rieh hashwa jong ka Lok Sabha ilekshon ka ban sa long shen.

Haba pynphai ia ka jingkren ba dang shen jong u nongialam ka AITC uba dei ruh u Myntri Rangbah barim ka jylla u Mudkul Sangma, u Bah Ronnie u la ong haba ia nujor bad ka West Bengal kaba don 42 tylli ki Lok Sabha seat, ka Meghalaya ka don tang 2 tylli ki seat.

“Kumta ki (AITC) ki la ong ngi la iaid shakhmat bad pynbna ia u kyrtong hapoh Meghalaya bad dei na kata ka daw ka TMC kam kwah ban iatreilang bad ngi (Congress), balei ba kim pynbna ba ki la poi sha ka jingiamynjur ban ia bhah seat hapoh West Bengal,” u la ong.

“Mynta kim kwah ban iatreilang bad ka Congress. Kumta ngi kwah ban buh jingkylli ia ki nongialam ka TMC, hato phi la poi sha ka jingiasngewthuh jingmut bad ka BJP. Hato ka don ka jingiadei kaba rieh hapdeng ka TMC bad ka BJP khnang ban pharia ia ki vote, ki paidbah kiba kwah ban iohi ia ka ri kaba pdiang bad burom ia baroh ki niam kum ka kynhun INDIA Bloc ban pynrem ia ka BJP kaba wanrah ka jingiapher niam bad kaba pyrshang ban ialam bakla ia ki paidbah halor kiba bun ki mat,” ong u nongialam Congress.

Une u nongialam liang pyrshah u la ong ruh, “Mynta to ngin buh jingkylli balei ba ka TMC kaba dei shibynta jong ka INDIA Bloc ka poi sha ka jingiasngewthuh jingmut bad iabhah ha kaba iadei bad ki constituency hapoh West Bengal.?

“Lada ka (AITC) ka la leh ia kane hapoh West Bengal, lehse ngi ruh ngin jin da la leh lang ha Meghalaya kumjuh ne dei ba don ka jingiasngewthuh jingmut hapdeng ka BJP bad ka TMC khnang ba ki vote jong ka liang pyrshah kin ia pait bad ba kan long ka jingioh nong ia ka BJP,” u la ong shuh shuh.

“Namar ka BJP mynta ka sngewthuh shai ba ka West Bengal ka don bun bah ki vote jong ki rit paid.Kumta lada ki iatreilang baroh ki vote jong ki rit paid kin leit sha ki party kiba dei jong ka INDIA Block.Kumta kane hi ka pynpaw ia kiei kiei kiba la buhrieh sha lyndet tang ban ioh kynnoh ia ka Meghalaya kaba don tang artylli ki seat bad ka West Bengal 42 tylli,” ong u Bah Ronnie uba la bynrap ruh ba lada ki artylli ki seat ki long kiba kongsan na ka bynta ka TMC bad ki 42 tylli ki seat kim long kiba donkam, kumta ruh Nga tharai kane ka pynpaw shai ia ka jinglong ba arsap.”

Shuh shuh une u nongialam ka Congress u la ong ruh, “phi iohi ia kiwei ki nongialam liang pyrshah, phi don ia ka CBI, ED, IT kiba la pynngat along bad kem ia ki. Hynrei ha West Bengal kam don satia kaba kum kane ka jingjia. Kumta Nga buh ka jingkylli la ka don mo ka jingiasngewthuh jingmut kaba rieh hapdeng ka BJP bad ka AITC.