Ka donkam ia ka jingiatreilang ka Sorkar bad ki Sengbhalang ban urlong ka jingdawa ILP: Paul

Syllad | The Rising MeghalayaJuly 19, 2024

U nongialam ka United Democratic Party (UDP) uba dei ruh u Myntri Sorkar u Bah Paul Lyngdoh u la ong ba ka Sorkar Jylla bad ki Sengbhalang ki dei ban iatreilang ban pynthikna ba ka Resolution kaba kyrpad ia ka sorkar Pdeng ban pyntreikam ia ka Inner Line Permit (ILP) kan long kaba seisoh bad ba don jingmut.

Haba kren sha ki lad pathai khubor ha ka 18 tarik Naitung, u Bah Paul u pyntip ba na ka liang ka sorkar ka la shim ia ka rai ban khot iakren ia ki sengbhalang hadien ka jingpynlong ka jong ki ia ki jingkhynra kot pyrshah ia ki nongtrei bylla kiba dei ki bar jylla. U la ong ruh ba u CM un lum ia ka jingialang bad baroh ki Sengbhalang ban iakren halor kiba bun ki mat da kaba ong ba u kyrmen skhem ba ka jingmih na kane ka jingiakren kan long kaba seisoh.

U Bah Paul uba dei ruh u nongaiktien ka MDA u la ong ruh ba ka jingiakhun ban ioh ILP kam dei ban long hapdeng ka sorkar Meghalaya pyrshah ia ki Sengbhalang ka Meghalaya.

“Hynrei ka dei ban long ba ka sorkar Meghalaya bad ki Sengbhalang ka Jylla kin iatreilang ryngkat ban wad ia ki lad ki lynti bad ban shim ia ka resolution ba la dep mynjur da ka iingdorbar thaw ain ka Jylla sha kaba kut,” u la ong.

Haba kylli, u Bah Paul ula ong ba ka jingwan rung ki bar jylla kumba ka la jia mynta ka dei eh namar ki nongbylla bad kane kala jia namar ba ki nongshong shnong ka Jylla jong ngi, kim lah satia ban pyndap ia ka jingdonkam nongbylla.

“Ka don ka jingbym ia biang hapdeng ka jingdawa (demand) bad ka jingpynioh (supply) bad kumta ngi la sakhi ia ki nongtrei bylla  bar jylla, hynrei kynmaw ruh bad ka Inter-State Migrant Workmen Act bad ki Rules ki la don hangne. Ha ka jingshisha ki la treikam ha ka por ba nga long Myntri ka Tnad Labour bad nga la tynruh ban pynkylla ia ka bad mynta ki nongbylla bar jylla ki hap ban register ia lade. Lada don kino kino ki jingduna, ka lah ban dei na ka jingduna briew /nongtrei. Kine ki dei ki mat kiba lah ban pynbeit, ngam iohi ia ka jingeh kaba khraw hangne,” u la bynrap.

Nalor kata u Bah Paul u la ong ba ka jingpynpaw jong ki Sengbhalang ia ka ‘Work Permit,’ ka dei ha ka jingshisha ka rukom treikam kaba ki nongbylla ki hap ban register ia lade ha ka Inter-State Migrant Workmen Act. Ia kane u la pynpaw haba jubab ia ka jingpyrshah namar ka jingkren jong u CM ka Jylla da kaba ong, Kam don satia ka Work Permit ha Meghalaya.”

“Ka don ka jingbym shai halor ka kyrteng. Ngi don ia ka bynta kaba dei ban register, kata ka rukom treikam ha kaba ki nongbylla bar jylla ki hap ban register ia lade hapoh ka Inter-State Migrant Workmen Act, bad kane ka dei ka bynta ha kaba ki Sengbhalang ki la shim kum ka ‘Work Permit’. Hynrei u Myntri Rangbah ruh um shym la bakla namar ngim khot ia kane (register) kum ka ‘Work Permit’ hynrei ka dei ka jing-register ia ki nongbylla ia kaba la khmih da ka tnad Labour. Nga tharai ba ka dei tang ka jingiasngewthuh bakla ha ka kyrteng hynrei ka rukom treikam hi ka dei ka juh. Kino kino kiba la trei 179 sngi la register kum ki nongbylla, hynrei lada ki tam ia kane ki hap ban register biang ia lade lane mih noh na ka jylla, kane ka lng kaba shai bha,” ong u Bah Paul.

Une u nongialam ka UDP haba kylli u la ong ruh, “Ngi dang shu dep ban jied ia u MP bathymmai bad ka nongrim jong ka VPP kaba jop kput ha kane ka elekshon ka dei kaba kyrshan ia ka ILP, bad kumta kan hap ban burom ia ka sur jng u paidbah ka Jylla.