Ka dorkhat ka HITO sha u Lat ka Jylla ban dawa pynkhlain iaki konsil bad pyntreikam dulir ïasoh

Syllad | The Rising MeghalayaSeptember 13, 2021

Ka Hynñiewtrep Integrated Territorial Organization (HITO) kala ai da ka dorkhat sha u Lat ka Jylla ban kyrpad ban pyntreikam ïa ka Annexed Agreement ba la soi bad pdiang da u C Rajagopalachari, u Governor General jong ka ri bad ki Khlieh Nongsynshar jong ka Federation of Khasi States ha ka 17 tarik Nailar 1948.

Ka HITO ban pynkhlain bad ïada ki riti ki dustur kynthup ïa ki hok katkum ka dulir ïasoh (Instrument of Accession bad Annexed Agreement -17 August 1948 jong ki Khasi States kynthup ïa ka ri lum Jaintia, kala buh ïa kine ki mat ki jura harum:

Ka HITO kala kyrpad ia u Lat ban iakren bad Myntri Rangbahduh ka ri bad u Myntri Kampohïng jong ka sorkar India bad thaw ïa ka komiti kaba kyrpang ka ban khlieh da u Myntri Kampohïng ban pyntreikam ïa ka soskular ba la thoh ha ka Instrument of Accession bad pyntreikam iaka jingbthah jong ka National Commission for Schedule Tribes (NCST) sha ka MHA ha u bnai Iaiong (April) 2012 bad bnai Risaw Naiwieng (Oct/Nov) 2014.

Katba ym pat lah ban pyntreikam ïa ka soskular ba la soi ha ka Annexed Agreement jong ka Instrument of Accession, ngi kyrpad ïa u Myntri Rangbahduh ka ri ba un pynkhat khia halor kine ki mat harum ha kaba ïadei bad ka jingpynkylla (amendment) kaba 125 jong ka riti synshar jong ka ri India ba la tyrwa ha ka snem 2019.

• Ban ym shah ïa ki seng saiñ pyrthei ban ïaleh ilekshon sha ki district council ha Meghalaya syriem kumba leh ha ka 4^th April 2000 ha kaba ïadei bad ka ilekshon sha ka municipal notification (Sec 15A jong ka Meghalaya Municipal (Amendment) Act 2000). “Sec 15A. Political Parties barred to contest elections – No person shall be allowed to contest a municipal election on the ticket or the Symbol of a political party recognized by the Election Commission of India”

Jingbatai:

1. Ka jingpykylla politik ïa ki district council ka la pynkylla khongpong ïa ka jingthmu jong ka ban pynneh pynsah ïa ki riti ki dustur. Ki seng saiñ pyrthei ki la ïuhroit ïa ka hok jong ki khlieh nongsynshar trai ri.
2. 97 na ka shispah la shem ba ki MDC ki ïakhun ïa ka ilekshon MLA. Ha ka snem 2018 26 ngut na ki 30 ngut ki MDC ki la ïakhun ïa ka ilekshon MLA. Kane ka ktah ïa ka jingtreikam ki council.    
3. Don bun ki khep ba ki MDC ki mushlia ïa ka rukom treikam jong ki syiem, sordar, doloi bad kumta ter ter.
4. Ïa ki skhim pynroi jong ka sorkar pdeng kaba dei na ka bynta ki shnong bapher bapher la shu sam dohkyndang hapdeng ki MDC.
5. Ki dorbar jong ki district ki long kiba lyngkot bad la i kumba la shu leh tang dep. Don kiba neh tang shi sngi ne ar sngi ruh.
6. Ka don ka jingpyntud bad shna ki aiñ kiba khlaiñ bad paka na ka bynta ka synshar khaddar ha ki shnong ki thaw. Ki district council ki khlem lah ban peit ïa ka khuid ka suba jong ki shnong ki thaw bad kim don ruh wat ïa ki jaka theh/bret ñiut.
7. Ym shem la lah ban pynbeit ïa ki jyrwit jyrwat kiba ïadei bad ki ain khlaw (Forest Conservation Act 1980) bad kumjuh ruh ha kaba ïadei bad ka Constitution (Schedule Tribes) Order 1950 bad 1976.
8. Ym shym la lah ban pyntreikam ïa ka IOA & AA bad ym shym la lah ruh ban pynbeit ïa u pud u sam bad ka jylla Assam bad ka ri Bangladesh ruh kumjuh.

• Dei ban bhah kyrpang shiphew tylli ki seat na ka bynta ki Khlieh Nongsynsar kum ki Syiem, Lyngdoh, Sirdar, Wahadar&Dolloi jong ki Hima/Elaka ha district council ban ailad ïa ki ban ïadon bynta ha kaba thaw aiñ na ka bynta ki hima/elaka etc. dei ban ai lad ar snem ka samoi treikam jong ki khang ban ïoh ban ai lad ïa baroh ki nongsynshar.

Jingbatai:

1. Ka Sixth schedule ka sdang treikam na duh ka  26th January, 1950. Shwa ban seng ïa ka United Khasi-Jaiñtia Hills Autonomous District Council la thung ïa ka Advisory Council da u Governor jong ka Assam, Shri Sri Prakasa kaba kynthup ïa ki 19 ki dkhot kiba pawkhmat kynthup ïa u Syiem Olim Sing Syiem, Syiem of HimaKhyrim bad kiwei de
2. Ka National Commission for Review of the Working of the Constitution (NCRWC) ba la thung da u Prime Minister Atal Bihari Vajpayee ha u March 2002 rekomen iaki Syiem, nokma, dolloi ban jied hadpeng para maki ban long dkhot ba shu sieh ha konsil.

Jingbatai:

• Ka jingailad ïa ki khlieh nongsynshar ba kin long chairman ha district council kan wanrah ïa ka burom jong ki council bad ka jingshaniah na ki paidbah.

• Donkam ban ithuh da ka riti synshar ïa ki rukom synshar trai ri.
• Dei ban pynhiar ïa ka samoi treikam jong ki council na ka 5 sha ka 4 snem.

• Ki dorbar jong ka district council ka dei ban duna ïa ka 20 sngi.

• Dei ban ailad ïa ki paidbah ban pynshong noh ïa ki dkhot ka council ki bym larkam.

Jingkynmaw:
Ka rukom jied MDC da ka ilekshon kam biang ha kaba uba ïoh bun ka bud u jop wat lada um ïoh ka jingkyrshan kaba pura na kiba bun.

Donkam ba phiah thymmai ïa ki constituency jong ki council khnang ba ki nongthep vote kin ïadon marryngkat.

Ka HITO ka artatien ïa ki rukom treikam jong ki council bad kumta ngi kyrpad ïa ka sorkar India ba kan peit halor kane ka kam ban pynthikna ba kine ki council ki treikam pura kumba la mang ïa ki. Haduh mynta ym pat shym lah ban thaw aiñ kiba paka halor ki jingsynshar trai ri.

By:
Donbok Dkhar President (H.I.T.O)
Wanbun Dkhar Secretary (H.I.T.O)