Ka East Khasi Hills kaba bun eh ki nongpang bampong ha u Tangnguid, ka daw na ka duma

Syllad | The Rising MeghalayaFebruary 14, 2024

Ka East Khasi Hills District kala kylla long ka district kaba bun eh ki briew kiba ngat haka jingpang bampong ha u Tangnguid ne Oesophagus Cancer bad ka daw ba ngat iaka jingpang ka dei na ka duma.

Ka ne ka jingkhein la pynpaw haka jingialang Meghalaya Cancer Conclave 2024 kaba long haka 12 bad 13 tarik une u bnai ha sor Shillong, kaba la wan ïashim bynta da ki oncologist, ki riewtihbniah, ki riewshemphang, NGO, kiba pyniaid iaki karkhana, ki heh sorkar bad kiwei kiwei. Ia kane ka jingialang ban iathir sani halor ka jingpang Cancer la pynlong da ka sorkar ryngkat ka jingiatreilang bad ka Apollo Telemedicine Networking Foundation (ATNF) kaba pyniaid da ka Meghalaya State Cancer Society.

Ka matpdeng jong kane ka conclave ka dei ‘Close the Care Gap’- kane ka phang ka thew dei ban weng ne pynjem noh iaka jingeh ki nongpang bad ban ai ka jingsumar kaba bha tam.

Ka jingkhein kaba lum dangshen kala kdew ba donkam kyrkieh iaka Jylla ban shim iaki sienjam ban iakhun iaka jingpang bampong ha u Tangnguid. Ka Indian Council of Medical Research – National Centre for Disease Informatics and Research (ICMR-NCDIR), kaba shim jingkhien iaka jingdon ki nongpang cancer haka Thaiñ Shatei Lam Mihngi – ha u snem 2021, kala lap ba ka East Khasi Hills District ka la paw haka rekod ha ka Ri ba kadei kaba bun eh kiba ngat haka jingpang cancer na ka daw u duma kaba la kot haduh 70.4% ha ki shynrang bad 46.5% ha ki kynthei.

Kiba bun na ki nongpang ki dei kiba shitom Tangnguid (Oesophagus) kaba la ktah haduh 66.9% ha ki shynrang bad 43.1% hapdeng ki kynthei.

Kiwei pat ki kynthup iaka bynta ka ryngdang (hypopharynx) bad kpoh ha ki shynrang bad ha ki cervix-uteri ne pla punkhun bad shyntur ha ki kynthei. Kumba ar na ka lai bynta napdeng ki shynrang kiba ngat ha kane ka jingpang bad kumba 40% pat ki kynthei kiba ngat ha kane ka jingpang ki dei napdeng kito kiba ju bam bad dih duma, bad kynrei bha ka bampong dei ha u Tangnguid.

Ka Dr Mazel Ampareen Lyngdoh Myntri ka Tnat ka koit ka khiah ka sorkar jylla haba aijingkren ha kane ka jingialang haka 12 tarik kala ong “kalong kaba donkam kyrkieh ban shim ia ki sienjam ha ka jingiakhun pyrshah ia ka jingpang bampong ne cancer”

Ka Myntri ka kyntu ruh ia ki kynhun kiba ia don bynta ba kam dei ban shu kut tang ha ki jingiakren hynrei ban pyntreikam ia ki sienjam kiba lah ban treikam bad aijingmyntoi shisha na ka bynta kito kiba donkam ia ki lad jingsumar.

Nalor kata ka la kdew ruh halor ka jingdonkam ban khmih halor ka jingpynioh ia ki lad jingsumar lyngba ki sienjam kum ka Meghalaya Health Insurance Scheme (MHIS) bad halor ka jingdonkam ban iada bad ban lap kloi ha ka jingiakhun pyrshah ia ka jingpang bampong ne cancer.

U Sampath Kumar, Principal Secretary, Department of Health & Family Welfare ha ka jingkren u la pynpaw halor ka jingdonkam ban shim ia ki sienjam kiba dei biang halor ki jingeh kiba iadei bad ka jingsumar ia ka jingpang bampong. Katba na ka liang ka Dr. Anisha Mawlong, HOD, Radiation Oncology Department, Civil Hospital Shillong ka la ai ka jingpynshai kaba kham bniah ha kaba iadei bad ka jingiaid lynti jong ka jylla ha ka jingiakhun pyrshah ia ka jingpang bampong.

Nalor kata ka la don ruh ka jingpynpaw bad jingphla na ka liang ki nongioh lait im na ki jingpang bampong kaba long shibynta jong ki lad jingsumar kaba kdew ruh halor ka jinglah ban ieng ialeh pyrshah, ka jingshlur bad ka jingkut jingmut ban iakhun pyrshah ia kane ka jait jingpang.

Ha kane ka prokram na ka liang ka Myntri ka la sam ruh ia ki Mobile Endoscopy Units shibynta jong ka Meghalaya Mission Cancer Prevention & Early Detection sha ka Civil Hospital Shillong, Civil Hospital Nongstoin, Jowai West Jaintia Hills, Mawkyrwat South West Khasi Hills, Tirot Singh Memorial, Civil Hospital Baghmara, bad kiwei bad la plie ruh ia ka promotional video jong ka Cancer Care Project kaba nyngkong.

Kiwei pat kiba la ai jingkren ha kane ka prokram ki kynthup ia u Joram Beda, Commissioner & Secretary, Department of Health & Family Welfare, Prof (Dr) Nalin Mehta, Director, NEIGRIHMS, bad Dr. K. Ganapathy nalor kiwei pat.

Ka jingpynlong ia ka ‘Meghalaya Cancer Conclave 2024’ kalong kaba kongsan ban shim ia ki sienjam ha kaba iadei bad ka jingiakhun pyrshah ia ka jingpang bampong hapoh ka thain. Kane ka pynpaw ruh ia ka jingkongsan jong ka jingiatreilang bad ka jingiasam ia ki jingtip kiba long ka jingkyrmen na ka bynta kito kiba shah ktah ha kine ki jait jingshitom.