Ka ‘Erbih ka Sorkar u Conrad Sangma

Banshan Ialari LyngdohAugust 5, 2020

Ngam kwah ban pynlut kai ïaka por jong phi ki nongpule. Ngan batai beit ïa ka mat ba kongsan jong kane ka jingthoh. Hynrei to, shuwa ban leh ïa kata, to ngin ïa phai dien sha kawei ka jingjia ha u snem 2018.

Ha ka lyngkhuh sngi ‘World Environment Day (WED) 2018’ lane kata ka sngi ba rakhe jingpynneh ïa ka mariang, u Myntri Rangbah, Conrad Sangma, ha ka jingkyntu ka jong u ïa ki samla ban pynduna ïa ka jingpyndonkam bor ding ilektik, u la ong, “If we can do this (save electricity) even for a day, it will, to a great extent, reduce pollution, help save energy and protect our environment.” [Lada ngi lah ban leh kumne (ban pynduna pyndonkam ilektrik) wat la dei tang shi sngi ruh, kan ïarap shibun ban pynduna ïa ka jing pynjulor ïa ka mariang, kan ïrap shibun ban kunai ïa ka bording ilektrik, bad ban ïada ïa ka mariang]. U la ïalap ruh shiphang ka jingsniew jong ka ‘plastic’ bad ka jingdonkam ban ‘pynneh ïa ka mariang khnang ba ka lyer bad ki lum ki wah kin khuid kin suba’. U la kular ba un ïaid da ka kjat na ïing sah jong u shaduh ka jaka treikam ha ‘secretariat’ kum ka jingnohsynniang sha kane ka kam pynneh mariang. U ju smat ban pynbna khubor lyngba ka ‘social media’, kumta ha ‘Twitter’ u la thoh kumne, “Walked from home to office to celebrate. It should be our agenda to reduce our carbon footprints. Our actions today will define the future for our children.” [Nga la ïaid kjat kum ka dak jingrakhe ïa ka ‘World Environment Day’. Ka dei ban long ka thong ba hakhmat eh ka jong ngi ba ngin pynneh ïa ka mariang. Ki akor ki jong ngi mynta, ki long ki dak jong ka jinglehbha na ka bynta ki khun ki jong phi bad ka lawei ka jong ki].

Wow! Kadei shisha ka jingkren jong u nongïalam ba don jingkitkhlieh na ka bynta ka mariang bad ka lawei jong ki khun ki jong ngi. Hynrei, sngew thamula pade ba u khlem ong wat shi kyntien ruh pyrshah ïa ki nongtih mawshun, nongshalan diewïong tuh, bad kiwei ki heh saipan kiba don kti ban pynjulor ïa ka Ri Khasi-Jaiñtia ba itynnad eh ka jong ngi; ka Ri Ba Ieid ki Blei. Ka lawei aïu kine ki nongpynjot mariang ki kular na ka bynta ki khun ki kti ki jong ngi?

Ki riewstad ki ju pynïasyriem ïa ka jylli saiñ pyrthei bad ka suiñ bneng. Kumba ki lyoh ha suiñ bneng kim ju long kiba ïaineh, kumta ka jinglong jingman jong ka saiñ pyrthei ruh ka ju kylla stet bha. Kaei kaba ki nongïalam ki kular mynta, bunsien hi ka kylla khongpong. Te da ngi ïa nujor ïa ka jingkren pynneh mariang jong u Myntri Rangbah ha u Jylliew 2018 bad kaei kaba jia ha une u Nailar 2020 ka ïapher baklybak. Da ïapynsriem ïa ki jingkren bad ki kam ba paw, une u Myntri Rangbah ngi lah ban ong u dei u ‘riew arsap bad uba shukor.

Ngan batai sani bha ba balei nga kynthoh tohmet kumne.

Ha ka 15 tarik u Kyllalyngkot, 2020, ka kot khubor phareng, ‘The Shillong Times’ ka pynmih ïa kawei ka khubor kaba kynthoh, “(There are) more than 20 Coke Factories in Shallang, West Khasi Hills that claim to have valid documents and have fulfilled all formalities and norms before commencing operations through Single Window Agencies.” [Ki don palat 20 tylli ki karkhana pynmih ‘coke’ (u ‘coke’ udei u diewïong ba la thang) ha Shallang, West Khasi Hills kiba kam ba ki don ïa ki kot ki sla kiba biang ba la ai da ka ‘Single Window Agency’ jong ka sorkar jylla]. Sngewbha kynmaw ïa ki kyntien ‘Single Window Agency’. Ha ka 1 tarik u Nailar, 2020 ka mih sa kawei ka jingpynbna ka ki rmiang shyntur jong u Bah S.K. Sunn, u nongmihkhmat na Mawphlang uba kyrshan ïa ka Sorkar MDA, bad uba dei u Shongknor (Chairman) jong ka ‘Meghalaya Assembly Committee on Environment’, lane kata ka kynhun ba dei peit ïa ka jinglong jingman ka mariang ha ka jylla Meghalaya. Ka mat ba kongsan ha kane ka jingbna ka jong u ka long, ‘Naduh u Nailar 2018, la bun bah ki karkhana ba shna ‘coke’ kiba la mih kum ki tit khlaw ha West Khasi Hills hapoh kine ki ar snem kiba kam ba ki la ïoh ïa ka ‘Single Window Clearance’ na ka sorkar jylla.’ Sa shisien, kata ka ‘Single Window Clearance’ ka mih pyrthei biang.

Ha ka 1 tarik u Nailar, 2020 ka kotkhubor ‘The Shillong Times’ haba ïadei bad kane ka jingpynbna jong u Bah Sunn, ka la thoh, “The Meghalaya Assembly Standing Committee on Environment has taken cognisance of the mushrooming of coke factories in the Shallang belt of West Khasi Hills during the last two years as 16 new coke factories were given clearance to by the Single Window Agency.” [Ka ‘Meghalaya Assembly Standing Committee on Environment’ ka la lap ba ki don bun bah ki karkhana pynmih ‘coke’ ha Shallang, West Khasi Hills ha kine ki ar snem. Ha kine ki ar snem naduh u 2018, la mih thymmai haduh 16 tylli ki karkhana kiba la ioh jingbit na ka ‘Single Window Agency’]. Sa shisien, kata ka ‘Single Window Agency/Clearance’ kaba ai jingbit ïa kine ki karkhana, ka mih biang.

Ha ka ‘website’ jong ka tnat treikam ‘Commerce and Industries’ jong ka sorkar jylla, ka don kawei ka jingpynbna ba don u ‘notification number’ IND. 49/2016/10, ba la soi ha ka 18 tarik u bnai Jylliew 2020, ha kaba la bthah ba u “Chairman” jong kata ka “Single Window Agency” u dei u “Chief Minister” jong ka jylla Meghalaya. Ka kam jong kane ka ‘Agency’ ka long ban ai jingbit ïa kino kino ki briew kiba kwah ban seng ïa ki karkhana ha ka jylla Meghalaya, bad ban leh katba ban “expedite” lane ban pynkloi ïa kita ki ‘permission’ ne ka jingai jingbit.

Kane ka ‘Single Window Agency’ kam dei kaba thymmai ne kaba dang shu sdang ha u 2018. Ka la don la kham slem bad uno uno u Myntri Rangbah ba don ha ka shuki, u dei u shongknor ne ‘Chairman’ jong kane ka ‘Agency’. Kane ka ‘Single Window Agency’ ka lah ban khang lynti lane ai jingbit ïa kano kano ka kynhun lane u ‘riewshimet ba kwah ban plie karkhana kum ki karkhana pynmih dewbilat, tih mawshun, ne ki karkhana ba shna ‘coke’. Te kumta, kino kino ki jingbit ba la ïoh naduh u 2018 haduh mynta u 2020, ki la ïaid lynti beit lyngba ki kti jong u Conrad Sangma. Ha kum kine ki por, ngi don hok ban kylli ïa u, “Hato phi la ‘sanitise’ bha ïa ki kti ki jong phi?”

Namar ba kum u Myntri Rangbah u ba long u Shongknor jong kane ka ‘Agency’ u dei ma u ba ai jingbit ïa haduh 16 tylli ki karkhana pynmih ‘coke’ kiba don ha Shallang, ka jaka ba bun bah u diewiong. Hato u long shisha uta u nongïada mariang kumba u la kren ne udei u ‘riew arsap kylla jutang?

Kum u Khlieh Duh jong ka Sorkar MDA bad u Shongknor jong kane ka ‘Agency’ u Conrad Sangma bad kata ka ‘Meghalaya Assembly Standing Committee on Environment’ ki dei ban ai jubab ïa kine ki jingkylli:

1.     Balei ka ‘Single Window Agency’ ka ai jingbit ïa haduh 16 tylli ki karkhana ‘coke’ kiba long ki tyllong pynmih ‘er-bih? Hato ka sorkar jylla ka la peit bniah bha shuwa, khamtam ha kaba ïadei bad ka jingpynjaboh ïa ka lyer jong ka shnong Shallang?

2.     Ka ‘State Pollution Control Board’ ka la bud thikna ne em ïa ka jingbthah jong ka Central Pollution Control Board da kaba pynkhreh ïa ka ‘Zoning Atlas’? [Ka ‘Zoning Atlas’ kadei ka kaiphod ba hap pynkhreh shuwa ban ai jingbit ïa kino kino ki karkhana. Ka kaiphod kadei ban kdew shai ha kano ka rukom ka jingseng ïa ka/ki karkhana kan kthah ïa ka mariang].

3.     U ‘Coke’ u dei u dewïong uba la thang haduh ba kiwei kiwei ki ‘chemical’ ba don ha u diewïong ki duh noh, bad u long u ba remdor bha. Haba ka ‘National Green Tribunal’ ka la khang ïa ka jingtih diewiong ha ka jylla naduh u snem 2014, kine ki kharkhana ki wanrah diewïong nangno mo?

4.     Ban ïoh ïa u ‘coke’, hap thang ïa u diewïong ha ka jingkhluit kaba palat 1000 degree. Kine ki 16 tylli ki karkhana ki pyndonkam da ki dieng, rnga ne da ka ‘gas’ ban thang diewïong? Da dei ba ki pyndonkam da ki dieng ne rnga, don ne em ki khlaw ba shah pynjulor?

5.     Uta u ‘coke’ la pyndonkam ha ki karkhana ba shna dew bilat bad ki karkhana shna nar ne ‘steel’. Ka don mo kano kano ka jingïasuh buit bad ki karkhana ha rilum Jaiñtia ne Byrnihat? Ka don ne em kano kano ka jingïasuh buit hapdeng ki trai karkhana ‘coke’, ki nongïalam saiñ pyrthei, ki ophisar ki tnat treikam jong ka ‘Commerce and Industries’, ‘Forest’ ne ‘Mining’?

6.     Hato la don mo kano kano ka jingpynbor na uno uno u MLA, nongkhaïi, ne ophisar ban ai jingbit ïa ki 16 tylli ki karkhana ban seng ha kajuh ka jaka? Da dei ba long kumta, u kloi mo ban ‘cancel’ ne weng noh ïa ka hukum kaba u la ai khamtam namar ba kan kthah ï aka koit ka khiah jong ki nongshong shnong kiba hap ban ring mynsiem da ka ‘er bih?

7.     Da dei ba don ba pynbor, u kloi mo ban ‘quarantine’ ialade shi por bad ai lad ïa u Symbud Myntri Rangbah ban shimti noh ha ka jaka ka jong u, bad phah tohkit bniah shuwa ha ka CBI? Hato kane kadei mo kawei na ki daw ba u ieh syndet noh ïa ka kam ‘Member of Parliament’ jong ka Tura, bad jynrat sharud ïa ki nongialam Khasi ban shimti ïa ka shuki Myntri Rangbah?

Kine ki dei katto katne ki jingkylli. Hynrei hato un jubab mo? Hato u kloi ban batai kumno kine ki karkhana pynmih ‘erbih kin ïada ïa ka mariang? Hato un pynshai ïa kane ka jingleh arsap ka jong u? Ne un bud ka nuksa jong u Narendra Modi u bym ju jubab ïa ki jingkylli ba shong nia? Hato ki nongïalam saiñ hima kiba don ha ka Liang Pyrshah kin kren halor kane ne ka don kano kano ka jingïasuhbuit lang? Da dei ba u Myntri Rangbah um jubab, ngan ïai pynmih shuh kum kine ki jingthoh halor kiwei pat ki phang kiba kdew sha ki kam arsap ki jong u ban pynshai paidbah.

Nga buh jingkylli ruh ïa kito ki kynhun kiba ju mih madan ban ïakhun ban ïeng rasong ka hok kum ka ICARE, Shillong We Care, COMSO, bad kiwei de ki seng ba bun ki ‘Riewshlur ba ïakhun na ka bynta ka ‘jaidbynriew’, khamtam kito ba don ha West Khasi Hills. Hato phin ïakhih pyrshah ha kane ka kynti? Ne phin shu ïa sngap jar namar ba u ‘coke’ u kham rem dor ban ïa u diewïong?