Ka Farmer’s card kam dei satia ka PM KISAN card; ong u MDC ka Tura katkum ka RTI

Syllad | The Rising MeghalayaJune 24, 2024

U MDC ka BJP na Tura, u Bernard N Marak ha ka 23 tarik Jylliew u la kynnoh ba ka Farmer’s Card  ba la pynioh sha ki paid nongrep kam dei satia ka PM KISAN card, kata katkum ka RTI.

Une u MDC u la ong ruh ba ka jingklumar jingmut bad ka daw balei kiba bun na ki nongrep kim ioh ia ki jingmyntoi lyngba ka PM KISAN ka la paw pyrthei lyngba ka RTI. Ia ka PM KISAN card ym shym la pynioh sha ki nongrep hynrei ia ka Farmer’s card ka bym dei satia ka PM KISAN card la pynioh sha kiba bun na ki nongrep ha ka Jylla.

“Kine ki artylli ki card kim dei satia ki juh. Lyngba ka RTI la shem ba donkam ia ki identity card jong ki nongrep na ka bynta ban leh ia ka rejistration hapoh jong ka PM KISAN bad kaba dei ban leh khnang ban ioh ia ka PM KISAN, hynrei ki nongrep ki la ioh ia kine ki PM KISAN card,” u la ong.

“Katkum ka jubab ba la ioh lyngba ka RTI ka long ba ka dei ka jingithuh jong ka Sorkar ia ka jingshakri jong ki nongshong shnong. Ia ka Farmer’s card dei ban pyniasoh ne link lyngba u unique identifier jong ki nongrep bad baroh ki skhim rep ia kiba la ioh pdiang da ki nongrep. Hynrei, naduh ba ki nongrep ki la register na ka bynta ka Farmer’s card, kiba bun na ki nongrep kim shym la ioh satia ia ki jingmyntoi kumba la kular da u Myntri Rangbahduh ka ri u Narendra Modi, kata ia kaba la sakhi lyngba ki jingujor ba la ioh pdiang na ki paid nongrep,” u la bynrap.

“Kiba bun na ki nongrep ki la pulom ban ioh ia ka jingmyntoi lyngba ka jingiarap pisa kaba long T.6000 shi snem kumba la kular ia ki lyngba ka PM KISAN ia kaba la ju ai ha ki lai bynta ha ka shi snem, hynrei ki bym shym la rung satia sha ki account jong ki nongrep. Wat ka jingai ram ba la tip kum ka KCC loan ruh ka long kaba shem jingeh ban ioh kumba la pynpaw da  ki nongrep,” u la ong shuh shuh.